އަތޮޅުތަކުގައި އިމާމުންނާއި ޚަތީބުން ތަމްރީނު ކުރަން ނިންމާފައިވާ ކަމަށް އިސްލާމިކް މިނިސްޓަރު ޑރ. އަހްމަދު ޒާހިރު ވިދާޅުވެއްޖެ އެވެ.
މިނިސްޓަރު މިހެން ވިދާޅުވީ މާލެ ސިޓީގައި އިމާމުންނާއި ޚަތީބުން ތަމްރީނު ކުރުމުގެ ޕްރޮގްރާމް ނިންމުމުގެ ގޮތުން ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ.
މިނިސްޓަރު ވިދާޅުވީ ކުރިއަށް އޮތް ތަނުގައި އިމާމުންނާއި ޚަތީބުން ތަމްރީނު ކުރުމުގެ ތިން ޕްރޮގްރާމް ކޮންމެ އަަހަރަކު ކުރިއަށް ގެންދިއުމަށް ރާވަމުންދާ ކަމަށެވެ.
ކުރިއަށް އޮތް ތަނުގައ އައްޑޫ، ފުވައްމުލަކު، ކުޅުދުއްފުށީ ސިޓީގައި ވެސް އިމާމުންނާއި ޚަތީބުން ތަމްރީނު ކުރުމުގެ ޕްރޮގްރާމްތައް ފައްޓާވާނެ ކަމުގައި ވެސް މިނިސްޓަރު ވިދާޅުވި އެވެ. އަތޮޅުތެރޭގެ އެހެން ރަށްރަށުގައިވެސް މި ޕްރޮގްރާމް ކުރިއަށް ގެންދިއުމަށް މަސައްކަތް ކުރައްވަމުން ގެންދާ ކަމަށްވެސް މިނިސްޓަރު ވިދާޅުވި އެވެ.
މިދިޔަ ބުރާސްފަތި ދުވަހުން ފެށިގެން ހޮނިހިރު ދުވަހުގެ ނިޔަލަށް ކުރިއަށް ގެންދިޔަ މި ޕްރޮގްރާމްގައި ޖުމްލަ 94 ބޭފުޅުން ބައިވެރިވި އެވެ. މިޕްރޮގްރާމްގެ 80 ޕަސެންޓަށް ވުރެ މަތިން ހާޒިރީ ލިބުނު ފަރާތްތަކަށް ވަނީ ޕްރޮގްރާމް ފުރިހަމަ ކުރިކަމުގެ ސެޓްފިކެޓް ހަވާލުކޮށްފަ އެވެ. އަދި 40 އާއި 80 ޕަސެންޓާ ދެމެދުން ހާޒިރީ ލިބުނު ފަރާތްތަކަށް ވަނީ ބައިވެރިވި ކަމުގެ ހަނދާނީ ލިޔުން ވެސް ދީފަ އެވެ.
މައިގަނޑު ގޮތެއްގައި މި ޕްރޮގްރާމްގައި ކިޔަވައިދީފައިވަނީ ތަޖުވީދު، ހުކުރު ގަވައިދާ އުސޫލު، ސިވިލް ސާވިސްގެ ގަވައިދާ އުސޫލު، މަސައްކަތުގެ އަހުލާގާއި، އެހެން މީހުންނާއި މުއާމަލާތްކުރުމާއި، ނަމާދުގެ ހުކުމްތައް އަދި ހިލާފީ މައްސަލަތަކުގައި އަމަލުކުރާނެ ގޮތް ފަދަ މައުލޫތަކަށެވެ.