ކޮވިޑް ވެކްސިންގެ ބޫސްޓާ ޑޯޒްތައް ގެނައުމުގައި ލަސްތަކެއް ކުރިމަތިވެފައިވާ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)އިން ބުނެފި އެވެ.
އެޗްޕީއޭއިން މިކަން ހާމަކުރީ މިއަދު އެ އެެޖެންސީން ބޭއްވި ނޫސްވެރިންގެ ބައްދަލުވުމުގައި ޑރ. އިބްރާހިމް އަފްޒަލް އެވެ.
އޭނާ ވިދާޅުވީ ބޫސްޓާ ޑޯޒް ލިބުމުގައި މިހާރު ލަސްތަކެއް ކުރިމަތިވެފައިވާ ކަމަށާއި ލިބުނުހާ އަވަހަށް އެ ޑޯޒް ޖަހަން ފަށާނެ ކަމަށެވެ.
އަފްޒަލް ވިދާޅުވީ ކުރިންވެސް ލިބޭނެ ކަމަށް ބުނި އަދަދަށް ބޫސްޓާ ވެކްސިން ލިބޭނެ ކަމުގެ ފުރިހަމަ އިތުބާރު އެބައޮތް ކަމަށެވެ. އެހެން ނަމަވެސް އެކަން ޕްރޮސެސް ކުރުމާއި ގެނައުމުގައި ބައެއް ފަހަރު ލަސްވެގެންދާ ކަމަށެވެ.
"ވެކްސިން ލިބޭނެ ކޮންމެވެސް ވަރެއްގެ ޑިލޭއެއް އައި ކަމުގައި ވިޔަސް. އަބަދުވެސް އަޅުގަނޑުމެން ފޮލޯކުރާނީ ވަކި ޓައިމް ފްރޭމެއްގެ ތެރެއިން. ބައިވަރު އެކްސްޓާނަލް ފެކްޓާޒްއާ ހުރެ އެ ޓައިމް ފްރޭމްއިން އެ ކަޓައިގެން ހިނގައިދާނެ. އެހެން ނަމަވެސް ވެކްސިން ހޯދުމުގެ މަސައްކަތް އެބަދޭ ކުރިއަށް،" އަފްޒަލް ވިދާޅުވި އެވެ.
ވެކްސިން ލިބުނުހާ އަވަހަށް އިތުރު ކެޓަގަރީތަކަށް ވެސް ވެކްސިން ދިނުމުގެ ފުރުސަތު ހުޅުވާލާނެ ކަމަށް އަފްޒަލް ވިދާޅުވި އެވެ.
މީގެ ކުރިން ރައީސް އިބްރާހިމް މުހައްމަދު ސޯލިހު ވިދާޅުވީ މި މަހުގެ މެދުތެރޭގައި ބޫސްޓާ ޑޯޒް ގިނަ ބަޔަަކަށް ދޭން ފަށާނެ ކަމަށެވެ. އަދި އެޗްޕީއޭއިން މީގެ ކުރިން ބުނީ ބޫސްޓާ ޑޯޒް ދިނުމަށް 100،000 ޑޯޒް ގެނައުމަށް މަސައްކަތް ކުރަމުންދާ ކަމަށެވެ.
ކޮވިޑް ވެކްސިންގެ ތިންވަނަ ޑޯޒް -- ބޫސްޓާ ޑޯޒް، އެޗްޕީއޭ އިން ޖަހަން ފަށާފައިވަނީ މިދިޔަ މަހުގެ ހަތަރު ވަނަ ދުވަހުން ފެށިގެނެވެ. އެއީ 60 އަހަރުން މަތީގެ މީހުންނާއި ދިފާއީ ނިޒާމު ބަލިކަށި މީހުންނާއި ފްރޮންޓް ލައިންގައި މަސައްކަތް ކުރާ ސިއްހީ މުވައްޒަފުނަށެވެ. މިހާރު 50 އަހަރުން މަތީގެ މީހުނަށް ވެސް ބޫސްޓާ ޑޯޒް ޖެހެ އެވެ.
މިހާތަނަށް އެ ވެކްސިން ޖަހާފައިވަނީ 20،653 މީހުނެވެ. ތިންވަނަ ޑޯޒެއްގެ ގޮތުގައި ދެނީ ފައިޒާ ވެކްސިނެވެ.