ރާއްޖޭގެ ފަތުރުވެރިކަމުގެ ޕީކް ސީޒަން ފަށާފައިވާއިރު ކޮވިޑްގެ ކޭސްތަކަކާ ގުޅިގެން 16 ރިސޯޓެއް މިވަގުތު މޮނިޓަރިންގައި އޮތް ކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ބުނެފި އެވެ.
އެޗްޕީއޭ އިން އާންމު ކޮށްފައިވާ މައުލޫމާތަށް ބަލާއިރު މޮނިޓަރިންގައި އޮންނަތާ އެންމެ ގިނަ ދުވަސްވީ ރިސޯޓަކީ އެޓްމޯސްފިއަ ކަނިފުށި މޯލްޑިވްސް އެވެ. އެ ރިސޯޓް މޮނިޓަރިން އަށް ލާފައި ވަނީ މިދިޔަ މަހުގެ 30 ވަނަ ދުވަހު އެވެ.
ރިސޯޓްތަކަށް ޗުއްޓީއަށް ދާއިރު ރައްކާތެރިކަމުގެ ފިޔަވަޅުތައް އެޅުމަށް އެޗްޕީއޭ އިން އިލްތިމާސް ކުރެ އެވެ. އަދި ރިސޯޓްތަކަށް ޒިޔާރާތް ކުރާ ފަތުރުވެރިންގެ ރައްކާތެރިކަމަށްޓަކައި އެޗްޕީއޭގެ ގަވައިދުތަކާއި އުސޫލުތަކާ އެއްގޮތަށް ރިސޯޓްތަކުން އަމަލު ކުރުމަށް ވެސް އެޗްޕީއޭ އިން ވަނީ ހަނދާންކޮށްދީފަ އެވެ.
މޮނިޓަރިންގައިވާ ރިސޯޓުތައް
- އެޓްމޯސްފިއަ ކަނިފުށި މޯލްޑިވްސް
- ރިޓްޒް ކާލްޓަން މޯލްޑިވްސް - ފަރި ކަނޑު ހުރާ
- މިރިހި އައިލެންޑް ރިސޯޓް
- އޮބްލޫ ސަންގެލި ރިސޯޓް
- ސޭންޑީސް ބަތަލާ ރިސޯޓް
- ކަނޑިންމަ މޯލްޑިވްސް
- މަނަފަރު އައިލެންޑް ރިސޯޓް
- ތާޖް ކޮރަލް ރީފް ރިސޯޓް
- އަދާރަން ސެލެކްޓް ހުދުރަންފުށި
- ލިލީ ބީޗް ރިސޯޓް
- މީރު އައިލެންޑް ރިސޯޓް
- ޕަޓީނާ މޯލްޑިވްސް - ފަރި ވެލި ހުރާ
- ފުރަވެރި މޯލްޑިވްސް
- ކެމްޕަސް އައިލެންޑް ފަރި އިރު ހުރާ
- ވަން އެންޑް އޮންލީ ރީތި ރަށް
- ސިނަމަން ހަކުރާ ހުރާ
އެޗްޕީއޭ އިން އާންމު ކޮށްފައިވާ މައުލޫމާތަށް ބަލާއިރު އަތޮޅުތަކުން 17 ރަށެއް ވެސް މިވަގުތު އޮތީ މޮނިޓަރިންގަ އެވެ. މޮނިޓަރިންގައި އޮންނަތާ އެންމެ ގިނަ ދުވަސްވީ އައްޑޫ ސިޓީގެ ހިތަދޫ އާއި މަރަދޫ އާއި މަރަދޫފޭދޫ އަދި ފޭދޫ އެވެ. އެ ރަށްތައް މޮނިޓަރިންނަށް ލާފައިވަނީ މިދިޔަ އޮގަސްޓު މަހުގެ 28 ވަނަ ދުވަހު އެވެ.
ރާއްޖެއިން ކޮވިޑްގެ ބަލި މީހުން ފެންނަ އަދަދު އެއް ވަރެއްގައި ހުންނަތާ ދުވަސްތަކެއް ވެއްޖެ އެވެ.