މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ކުރިއަށް ގެންދިޔަ ސޭފްޓީވީކްގެ އެންމެ ފަހު ހަރަކާތް ކަމަށްވާ "ޕޯޓް ސޭފްޓީވީކް ރަން" ކާމިޔާބުކަމާއި އެކު މިއަދު ނިންމާލައިފި އެވެ.
އެމްޕީއެލް އިން ސޭފްޓީވީކް ކުރިއަށް ގެންގޮސްފައި ވަނީ މިމަހުގެ 26 ވަނަ ދުވަހުން ފެށިގެން މިއަދުގެ ނިޔަލަށެވެ. މިއަދު ހެނދުނު ހުޅުމާލެ އިންޓަނޭޝަނަލް ޓާމިނަލް އިން ފެށި މި ދުވުމުގައި 100 އަށްވުރެ ގިނަ މީހުން ވަނީ ބައިވެރިވެފަ އެވެ.
ދުވުމުގައި އަންހެން ކެޓެގަރީ އަދި ފިރިހެން ކެޓަގެރީން ވަނަތަކަށް ހޮވުނު މީހުންނަށް ވަނީ ފައިސާގެ އިނާމު ދީފަ އެވެ.
އަންހެން ކެޓަގަރީން އެއްވަނަ އަށް ޝަމްހާ ދިޔައިރު، ދެވަނަ އަށް ދިޔައީ ހުސްނާ މުހައްމަދެވެ. އަދި ތިން ވަނައަށް ދިޔައީ ނަޝީދާ އަލީ އެވެ. އެއްވަނަ އަށް ދިޔަ ފަރާތަށް 2500ރ. ދީފައިވާއިރު ދެވަނައަށް 1500ރ. އަދި ތިން ވަނައަށް ދިޔަ ފަރާތަށް 500ރ. ވަނީ ހަދިޔާކޮށްފަ އެވެ.
އަންހެން ކެޓެގެރީން ވަނަތަކަށް ދިޔަ ފަރާތްތަކަށް އިނާމު ހަވާލުކޮށްދެއްވީ އެމްޕީއެލްގެ ޗެއާމަން ކެޕްޓަން މުހައްމަދު ޝަރީފު އެވެ.
ފިރިހެން ކެޓަގެރީއިން އެއްވަނަ އަށް ގޮސްފައި ވަނީ ހުސައިން ރިޒާ އެވެ. ދެވަނަ އަށް އާބިދު ދިޔައިރު، ތިންވަނަ އަށް ދިޔައީ ފަރުހާދު އެވެ. މި ބައިވެރިންނަށް އިނާމު ހަވާލުކޮށްދެއްވީ އެމްޕީއެލްގެ ސީއީއޯ ޝާހިދު އަލީ އެވެ.
މީގެއިތުރުން، ދުވުމުގައި ޖާޒީ ވެސް ވިއްކި އެވެ. ޖާޒީ ވިއްކައިގެން ލިބުނު ފައިސާ ވަނީ ކުޑަކުދިންގެ ހައްގުތައް ހިމާޔަތް ކުރަން މަސައްކަތް ކުރާ ޖަމިއްޔާ (އާކް) އަށް ހަދިޔާކޮށްފަ އެވެ. އެގޮތުން، 23،700ރ. އާކް އާއި ހަވާލުކޮށްދެއްވީ އެމްޕީއެލްގެ ޗީފް ފައިނޭންޝިއަލް އޮފިސަރު މުހައްމަދު މުއިއްޒު އެވެ.
އެމްޕީއެލް އިން ބުނީ ،އެ ކުންފުނިން އޮކިއުޕޭޝަނަލް ހެލްތް އެންޑް ސޭފްޓީއަށް އާންމުން ހޭލުންތެރިކުރުމަށް ހަފްތާއެއް ހާއްސަކުރުމުގެ ބޭނުމަކީ، ސަލާމަތާއި ރައްކާތެރިކަމަށް އިސްކަންދޭ ސަގާފަތެއް ބޭނުންކުރުމަށް ކަމަށެވެ. އަދި، ކުރިއަށް އޮތް ތަނުގައި މިއަށްވުރެ ފުޅާކޮށް މިކަންތައް ކުރިޔަށް ގެންދިއުމަށް އެ ކުންފުނިން ރާވާފައިވާ ކަމަށެވެ.