ނުކުޅެދުންތެރިކަން ހުންނަ މީހުންނާ ބެހޭ ގައުމީ ދަފްތަރު، މިއަހަރުގެ ޖޫން ނުވަތަ ޖުލައި މަހުގެ ތެރޭގައި އެކުލަވާލެވޭނެ ކަމަށް ޖެންޑާ މިނިސްޓަރު އައިޝަތު މުހައްމަދު ވިދާޅުވެއްޖެ އެވެ.
މިނިސްޓަރު މިހެން ވިދާޅުވެފައި މިވަނީ ނުކުޅެދުންތެރިކަން ހުންނަ މީހުންނާ ބެހޭ ޖުމްލަ އަދަދާއި ތަފްސީލް އެނގޭ ގައުމީ ދަފްތަރެއް ނެތް ކަމަށް ރައީސް އިބްރާހީމް މުހައްމަދު ސޯލިހް ވިދާޅުވެފައި ވަނިކޮށެވެ.
ރައްޔިތުންގެ މަޖިލީހުގައި އިއްޔެ ރިޔާސީ ބަޔާން އިއްވަވަމުން ރައީސް ސޯލިހް ވިދާޅުވީ ނުކުޅެދުންތެރިކަން ހުންނަ މީހުންނާ ބެހޭ ގައުމީ ދަފްތަރަކީ އެމީހުންނަށް ބޭނުންވާ ފަރުވާއާއި ރިހިބިލިޓޭޝަން އަދި ތެރަޕީއާއި، އެހެނިހެން ހިދުމަތްތައް ފޯރުކޮށްދިނުމަށް އޮތް ވަސީލަތަކަށް ވާނެ ކަމަށެވެ. ސަރުކާރުން އެފަދަ ދަފްތަރެއް އެކުލަވާލަމުންދާ ކަމަށް ފާހަގަކުރައްވާ ރައީސް ވިދާޅުވީ ދަފްތަރު ނިމުމުން ނުކުޅެދުންތެރިކަން ހުންނަ މީހުންނަށް ސަރުކާރުންދޭ އިނާޔަތް މި އަހަރުގެ ފަހު ތިން މަހުގެ ތެރޭގައި ބޮޑުކުރާނެ ކަމަށެވެ.
ނުކުޅެދުންތެރިކަން ހުންނަ މީހުންނާ ބެހޭ ގައުމީ ދަފްތަރާ ގުޅޭގޮތުން މިނިސްޓަރު އައިޝަތު މުހައްމަދު ވިދާޅުވީ ދަފްތަރެއް އެކުލަވާލުމުގެ މަސައްކަތް ހިނގަމުންދާއިރު ކަމާ ގުޅޭ ކްލެސިފިކޭޝަން ގަވައިދު މިހާރު އެކުލަވާލާފައިވާ ކަމަށެވެ.
ނުކުޅެދުންތެރިކަން ހުންނަ މީހުންނަށް ދައުލަތުން މިހާރު ދެނީ 2،000 ރުފިޔާގެ އެލަވަންސެކެވެ. އެ އަދަދު 5،000 ރުފިޔާ ބޮޑުކޮށްދިނުމަށް ނުކުޅެދުންތެރިކަން ހުންނަ މީހުން ދަނީ ތަކުރާރުކޮށް ސަރުކާރުގައި އެދެމުންނެވެ.
މިނިސްޓަރު ވިދާޅުވީ ރައީސް އިބްރާހީމް މުހައްމަދު ސޯލިހްގެ ވިސްނުންފުޅަކީ އެލަވަންސް ބޮޑުކުރުން ކަމަށެވެ. އަދި ނުކުޅެދުންތެރިކަން ހުންނަ މީހުން ބެލުމުގައި ހަރަކާތްތެރިވާ މީހުންނަށް އެލަވަންސެއް ދިނުމަށްވެސް ސަރުކާރުގެ ކަމާ ގުޅުންހުރި އިދާރާތަކުގެ މެދުގައި މަޝްވަރާތައް ކުރެވެމުންދާ ކަމަށް ވިދާޅުވި އެވެ.
"އެފަދަ މީހުންނަކީ ވަޒީފާއަށް ދެވޭނެ ބައެއް ނޫން. އާމްދަނީ ހޯދަން އިތުރު މަސައްކަތެއް ކުރެވޭނެ ބައެއް ނޫން. ފުލްޓައިމް ނަރުހެއްގެ ގޮތުގައި އުޅެންޖެހޭ ބައެއް. އެހެންކަމުން އެފަދަ ފަރާތްތަކަށް ކެއާ އެލަވަންސެއް ދިނުމަށް މަޝްވަރާކުރަމުން މިދަނީ،" މިނިސްޓަރު ވިދާޅުވި އެވެ.
އައިޝަތު މުހައްމަދު ވިދާޅުވި ގޮތުގައި ނުކުޅެދުންތެރިކަން ހުންނަ މީހުންގެ ދަފްތަރުގައި މިހާތަނަށް ރަޖިސްޓްރީކޮށްފައިވަނީ 9،646 މީހުންނެވެ. ނުކުޅެދުންތެރިކަން ހުންނަ މީހުންނަށް މިދިޔަ އަހަރު 233 މިލިއަން ރުފިޔާ ހަރަދުކޮށްފައިވާ ކަމަށް ފާހަގަކުރައްވަމުން މިނިސްޓަރު ވިދާޅުވީ އެފަދަ މީހުންގެ ތެރަޕިއުޓިކް ފަރުވާއަށް 335 ފަރާތަކަށް، 20 މިލިއަން ރުފިޔާ ވެސް ހަރަދުކޮށްފައިވާ ކަމަށް ވިދާޅުވި އެވެ.
އިޖުތިމާއީ ބަދަހި މަދަދުވެރިން "އިބަމަ"އިގެ ދަށުން މިހާތަނަށް ތިން އަތޮޅެއްގައި 73 މެންބަރުން ތަމްރީންކޮށް 10 އަތޮޅެއްގައި މަސައްކަތް ފަށައި އިތުރު ތަމްރީންތައް ކުރިއަށް ގެންދިއުމަށް ތައްޔާރުވަމުންދާ ކަމަށްވެސް ވިދާޅުވި އެވެ. ނެޝެނަލް ސޯޝަލް ޕްރޮޓެކްޝަން ފްރޭމްވޯކެއް އެކުލަވާލުމުގެ މަސައްކަތް ހިނގަމުންދާއިރު އިޖުތިމާއީ ރައްކާތެރިކަމުގެ ޕްރޮގްރާމްތަކާއި ގުޅޭ މޯބައިލް އެޕްލިކޭޝަނެއް ތައްޔާރުކުރަމުންދާ ކަމަށްވެސް މިނިސްޓަރު ވަނީ ހާމަކުރައްވާފަ އެވެ.