ރާއްޖޭގެ ފަތުރުވެރިކަމަށް 50 އަހަރު ފުރޭ ރަންޔޫބިލާ ދިމާކޮށް ""އަޕްބީޓް ޓޯކް ޝޯ"ގެ ނަމުގައި ސިލްސިލާ ޓޯކް ޝޯއެއް ފެށުމަށް ތައްޔާރުވެއްޖެ އެވެ.
މި ޝޯގެ ފުރަތަމަ ބައި ފެށުމަށް ހަމަޖައްސާފައިވަނީ މިމަހުގެ 17 ވަނަ ދުވަހު އެވެ.
ގައުމީ ޔުނިވަސިޓީގެ އޮޑިޓޯރިއަމްގައި ބާއްވާ ޝޯގެ ފުރަތަމަ ބައި ހުށަހަޅުއްވައިދެއްވާނީ ޓޫރިޒަމް މިނިސްޓަރު ޑރ. އަބްދުﷲ މައުސޫމް އެވެ.
ފުރަތަމަ ޝޯގައި ބައިވެރިވެވަޑައިގަންނަވާނީ ރާއްޖޭގައި ޓޫރިޒަމް ފެށުމަށް މަސައްކަތް ކުރެއްވި މަޓީގެ ޗެއާމަން މުހައްމަދު އުމަރު މަނިކާއި، ޗަމްޕާ ހުސައިން އަފީފާއި، މިނިސްޓާ އޮފް ހެލްތު އަހްމަދު ނަސީމް އާއި ރާއްޖެއަށް ފުރަތަމަ ޒިޔާރާތް ކުރި ފަތުރުވެރިޔާ އިޓަލީވިލާތުގެ ޖޯޖް ކޯބިން އެވެ.
ޝޯގައި ބައިވެރިވާ މެހްމާނުން ރާއްޖޭގައި ފަތުރުވެރިކަން ފެށުނު ގޮތާއި އެ ދާއިރާ ތަރައްގީވެގެން އައި ގޮތުގެ މައްޗަށް ތަފްސީލްކޮށް ވާހަކަދައްކަވާނެ އެވެ.
ރާއްޖޭގައި ރަސްމީކޮށް ޓޫރިޒަމް ފެށިގެން އައީ ފެބްރުއަރީ 16، 1972 ގައި ކަމަށް ސަރުކާރުން ދެކެ އެވެ.