ރާއްޖެއަށް މިމަހުގެ މިހާތަނަށް ޒިޔާރަތްކުރި ފަތުރުވެރިންގެ އަދަދު ދަށަށް ހިނގައްޖެ އެވެ.
ޓޫރިޒަމް މިނިސްޓްރީން އާންމުކޮށްފައިވާ ތަފާސްހިސާބުތައް ދައްކާ ގޮތުން މިމަހުގެ ފުރަތަމަ 11 ދުވަހު ރާއްޖެ ޒިޔާރަތްކުރީ 62،249 ފަތުރުވެރިންނެވެ.
މިއީ މިދިޔަ އަހަރުގެ މި މުއްދަތުގައި ޒިޔާރަތްކުރި 63،523 ފަތުރުވެރިންނަށްވުރެ ދެ ޕަސެންޓް ދަށް އަދަދެކެވެ.
ރާއްޖެއަށް ޑިސެމްބަރު މަހު ޒިޔާރަތްކުރި ފަތުރުވެރިންގެ އަދަދު ދަށްވި ނަމަވެސް އަހަރުގެ މިހާތަނަށް ޒިޔާރަތްކުރި ފަތުރުވެރިންގެ އަދަދު ވަނީ މިދިޔަ އަހަރުގެ މި މުއްދަތާ އަޅާބަލާއިރު 8.7 ޕަސެންޓް އިތުރުވެފަ އެވެ.
ރާއްޖެއަށް މިމަހު ޒިޔާރަތްކުރި ފަތުރުވެރިންގެ އަދަދު ދަށްވެފައި މިވަނީ އެއާޕޯޓް ޓެކުހާއި ފީތައް މިމަހުން ބޮޑުކޮށްފައިވަނިކޮށެވެ.
އެ ގޮތުން އިކޮނޮމީ ކްލާހުގައި ދަތުރުކުރާ ބިދޭސީއެއްގެ އަތުން ނަގަމުންދިޔަ 30 ޑޮލަރުގެ ފީ 50 ޑޮލަރަށް ވަނީ ބޮޑުކޮށްފަ އެވެ.
ބިޒްނަސް ކްލާހުގައި ދަތުރުކުރާ ދިވެހިންނާއި ބިދޭސީންގެ އަތުން 120 ޑޮލަރު ނަގަން ފަށާފައިވާއިރު ކުރިން ނެގީ 60 ޑޮލަރެވެ.
ފަސްޓް ކްލާހުގައި ދަތުރުކުރާ އެންމެންގެ އަތުން 240 ޑޮލަރު ނަގާއިރު ކުރިން ނެގީ 90 ޑޮލަރެވެ.
މީގެ އިތުރުން ރާއްޖެ އަންނަ ޕްރައިވެޓް ޖެޓުތަކުގައި ދަތުރު ކުރާ ކޮންމެ މީހެއްގެ އަތުން 480 ޑޮލަރު ވަނީ ނަގަން ފަށާފަ އެވެ. މީގެ ކުރިން ޕްރައިވެޓް ޖެޓުތަކުގައި ދަތުރުކުރާ މީހުން އަތުން ނެގީ 120 ޑޮލަރެވެ.