ފަތުރުވެރިކަމުގެ ދާއިރާ އަށް ހާއްސަ އެވޯޑް ތަކެއް ދިނުމަށް ޓޫރިޒަމް މިނިސްޓްރީން ނިންމައިފި އެވެ.
މިއީ ރާއްޖޭގެ ފަތުރުވެރިކަމަށް މިއަހަރު 50 އަހަރު ފުރޭތީ ރަންޔޫބިލް މުނާސަބަތާ ދިމާކޮށް ތައާރަފްކުރާ އެވޯޑްތަކެކެވެ.
ޓޫރިޒަމް މިނިސްޓްރީން ބުނީ މިއަހަރުން ފެށިގެން ދެން ކޮންމެ އަހަރަކު ވެސް އެވޯޑްތައް ދެމުން ގެންދާނެ ކަމަށެވެ.
އަލަށް ދޭން ފަށާ އެވޯޑްތަކުގެ ތެރޭގައި ހިމެނެނީ ދިވެހިންނަށް ވަޒީފާގެ ފުރުސަތުތައް ފަހިކޮށްދޭ ފަރާތްތަކަށް ދޭ އެވޯޑަކާއި، ފަތުރުވެރިކަމުގެ ދާއިރާގެ އެކި މަގާމުތަކަށް މީހުން ބިނާކުރަން ބާރު އެޅުމަށް ދޭ އެވޯޑަކާއި، ދިވެހި ފަންނާނުންގެ ކުރިއެރުމަށް ހިތްވަރުދީ އެކަމަށް މަސައްކަތް ކުރާ ފަރާތްތަކަށް ދޭ ތިން އެވޯޑެކެވެ.
މީގެއިތުރުން ފަތުރުވެރިކަމުގެ ދާއިރާގައި މަސައްކަތްކުރާ މުވައްޒަފުންނަށް ފަސޭހަކޮށްދިނުމުގެ ގޮތުން ކަންތައްތަކެއް ފަހިކޮށްދިނުމަށް މަސައްކަތް ކުރާ ފަރާތްތަކަށް ދޭ ހަތަރު އެވޯޑަކާއި، ދިވެހި އުފެއްދުންތަކަށް ހިތްވަރުދީ އެފަދަ އުފެއްދުންތައް ބޭނުންކުރާ ފަރާތްތަކަށް ދޭ އެވޯޑަކާއި އަދި އަންހެނުންނަށް ވަޒީފާގެ ފުުރުސަތުތައް ފަހިކޮށްދިނުމަށް މަސައްކަތްކުރާ ފަރާތްތަކަށް ދޭ އެވޯޑެއް ވެސް ހިމެނެ އެވެ.
އެ ވޯޑްތަކަށް ކުރިމަތިލުމަށް ހުޅުވާލުމަށް ޓޫރިޒަމް މިނިސްޓްރީން ނިންމާފައިވަނީ މިއަހަރުގެ ޖޫން މަހުގެ ތެރޭގަ އެވެ.
ޓޫރިޒަމް މިނިސްޓްރީން ބުނީ ފަތުރުވެރިންނަށް ހިދުމަތް ދޭ ތަންތަނުން އެވޯޑަށް ހުށަހެޅޭނެ ކަމަށެވެ. އެގޮތުން ރިސޯޓުތަކާއި ޓޫރިސްޓް ހޮޓާތަކާއި ގެސްޓް ހައުސްތަކާއި އަދި ސަފާރީތަކަށް އެ ފުރުސަތު އޮންނާނެ ކަމަށް މިނިސްޓްރީން ބުނެ އެވެ.
ރާއްޖޭގެ ފަތުރުވެރިކަމަށް 50 އަހަރު ފުރޭ މުނާސަބާ ފާހަގަކުރުމުގެ ގޮތުން މުޅި އަހަރަށް ބަހާލައިގެން ތަފާތު ހަރަކާތްތަކެއް ހިންގުމަށް ޓޫރިޒަމް މިނިސްޓްރީން ނިންމާފައިވެ އެވެ.