ރައްޔިތުން މަޖިލީހުގެ ދާއިމީ ތިން ކޮމިޓީތަކަށް ކޮމަންޑޫ ދާއިރާއަށް އަލަށް އިންތިހާބުވި މުހައްމަދު ރާޝިދު ހަމަޖައްސައިފި އެވެ.
މިއަދުގެ މަޖިލސް ޖަލްސާ ފައްޓަވައި ދެއްވަމުން، މަޖިލީހުގެ ރައީސް މުހައްމަދު ނަޝީދު ވިދާޅުވީ މަޖިލީހުގެ ގަވާއިދުގެ 131 ވަނަ މާއްދާގެ (ށ) ގެ ދަށުން، ބައެއް ކޮމިޓީތަކަށް ބަދަލު ގެނެސްފައިވާ ކަމަށެވެ.
ނަޝީދު ވިދާޅުވީ މާލިއްޔަތު ކޮމެޓީއަށް އެމްޑީޕީގެ ފަރާތުން، ފުވައްމުލަކު ދެކުނު ދާއިރާގެ މެމްބަރު މުހައްމަދު މުމްތާޒު ހަމަޖައްސާފައިވާ ކަމަށެވެ. އަދި އާންމު ކޮމެޓީގައި އެމްޑީޕީގެ ފަރާތުން ހިމެނިވަޑައިގަންނަވާ މެމްބަރު މުމްތާޒުގެ ބަދަލުގައި އެ ކޮމިޓީއަށް ކޮމަންޑޫ ދާއިރާގެ މެންބަރު ރާޝިދު ވަނީ ހަމަޖައްސާ ކަމަށެވެ.
ލާމަރުކަޒީ ކޮމެޓީއަށް އެމްޑީޕީގެ ފަރާތުން ހިމެނިވަޑައިގަންނަވާ މަޑަވެލި ދާއިރާގެ މެމްބަރު ހުސައިން ފިރުޝާންގެ ބަދަލުގައި އެކޮމިޓީއަށާއި ވެސް ރާޝިދު ހަމަޖައްސާ ކަމަށް ނަޝީދު ވިދާޅުވި އެވެ. އަދި އިމްތިޔާޒާ ސުލޫކު ކޮމެޓީއަށްވެސް ރާޝިދު ވަނީ ހަމަޖައްސާ ކަމަށެވެ.
މުހައްމަދު ރާޝިދު، ރައްޔިތުންގެ މަޖިލީހުގެ ކޮމަންޑޫ ދާއިރާގެ މެންބަރު ކަމުގެ ހުވާ ކުރައްވާފައިވަނީ މި މަހުގެ ނުވަ ވަނަ ދުވަހުގަ އެވެ.
ކޮމަންޑޫ ދާއިރާގެ ބައި އިލެކްޝަން ރާޝިދު ކާމިޔާބު ކުރެއްވީ އޭނާއާ ވާދަކުރެއްވި ޕީޕީއެމްގެ ކެންޑިޑޭޓް މޫސާ ފަތުހީއާ ވާދަކުރައްވާ 240 ވޯޓްގެ ތަފާތުން ކުރި ހޯއްދަވައިގެންނެވެ.