މަންތާ އެއާގެ އައްޑޫ ދަތުރުތައް ބުރާސްފަތި ދުވަހު ފެށުމަށް ނިންމާ ޓިކެޓްގެ އަގު އިއުލާންކޮށްފި އެވެ.
މަންތާ އެއާ އިން ނިންމާފައިވަނީ ކޮމްފަޓް ކުލާހުން އެއްކޮޅަށް 1250 ރުފިޔާ އަށް ޓިކެޓް ވިއްކާށެވެ. ސެފަޔާ ކުލާހުގެ ޓިކެޓެއް 1850 ރުފިޔާ އަށް ވިއްކުމަށެވެ.
އެ އެއާލައިންގެ އެޖެންޓުން މެދުވެރިކޮށް ޓިކެޓް ގަންނަން ލިބޭނެ އިންތިޒާމު މަންތާ އެއާ އިން މިހާރު ވަނީ ހަމަޖައްސާފަ އެވެ.
މަންތާ އެއާގެ ދަތުރުތައް ފެށުމަށް ތައްޔާރުވަމުން މިދަނީ އައްޑޫގެ ކަމާގުޅޭ ފަރާތްތަކާ އެކު ކުރެވުނު މަޝްވަރާތަކަށް ފަހު އެ އެއާލައިންގެ އައްޑޫ ދަތުރުތަކަށް ޑިމާންޑް އޮންނާނެ ކަމަށް ބަލައިގެންނެވެ.
އައްޑޫ އަށް ކުރާ ދަތުރުތަކުގައި މަންޓާ އެއާ އިން ބޭނުންކުރަން ނިންމާފައިވަނީ އޭޓީއާރު 600-72 މަރުކާގެ ޖާގަ ތަަނަވަސް ބޯޓު ތަކެކެވެ.
މަންތާ އެއާގެ ފުރަތަމަ ބޯޓު ރާއްޖެ ގެނެސްފައިވަނީ 2018 ވަނަ އަހަރުގެ ނޮމެމްބަރު މަހު އެވެ. ދެވަނަ ބޯޓެއް ރާއްޖެ ގެނެސް މަންތާ އެއާގެ ދަތުރުތައް ފެށީ ފެބްރުއަރީ 24، 2019 ގައެވެ.
ރާއްޖޭގައި އެންމެ ފަހުން ޑޮމެސްޓިކް ދަތުރުތައް ފެށި މަންތާ އެއާލައިނުން މިހާރު ހުޅުލެއިން ދަތުރުކުރަނީ ދަރަވަންދޫ އާއި ކުޑަހުވަދޫ އެއާޕޯޓަށެވެ.