ދަރުބާރުގޭގެ އިރަށް އޮންނަ ބިމުގައި ސްޓްރީޓްފުޑް ކޮންސެޕްޓްގެ ފުޑްކޯޓެއް އެޅުމަށް ޝައުގުވެރިވާ ފަރާތްތަކަށް ފުރުސަތު ހުޅުވާލައިފި އެވެ.
ސިޓީ ކައުންސިލުން މިއަދު ކޮށްފައިވާ އިއުލާނެއްގައި ވަނީ ކައުންސިލުން އެކުލަވާލާފައިވާ ޕްލޭނާ އެއްގޮތަށް އައުޓްޑޯ ފުޑް ކޯޓެއް އެޅުމަށް ޝައުގުވެރިވާ ފަރާތްތަކުން އަންނަ މަހުގެ ތިންވަނަ ދުވަހުގެ ކުރިން ޕްރޮޕޯސަލް ހުށަހެޅުމަށް ފުރުސަތު ހުޅުވާލާފަ އެވެ.
މިމަސައްކަތާ ގުޅޭ އެއްވެސް މައުލޫމާތެއް ހޯދަން ބޭނުންވާނަމަ ސިޓީ ކައުންސިލަށް އީމެއިލްކޮށްގެން އެ މައުލޫމާތު ހޯދުމަށް ވެސް އިއުލާންގައި ބުނެފައިވެ އެވެ.
މާލޭގައި ފުޑްކޯޓެއް ހެދުމަކީ ސިޓީ ކައުންސިލްގެ މިދައުރުގެ ސްޓްރެޓެޖިކް އެކްޝަން ޕްލޭން (ސެޕް)ގައި ހިންގުމަށް ކަނޑައަޅާފައިވާ މަޝްރޫއެކެވެ.
ފުޑްކޯޓު އަޅަން ސިޓީ ކައުންސިލުން ލޯނެއް ނެގުމަށް ކައުންސިލުން މިދިޔަ މަހުގެ 24 ވަނަ ދުވަހު ބޭއްވި ބައްދަލުވުމުގައި ހުރިހާ ކައުންސިލަރުންގެ އިއްތިފާގުން ވަނީ ފާސްކޮށްފަ އެވެ. ލޯން ނެގުމުގެ ހުއްދައަށް މިދިޔަ މަހުގެ ތެރޭގައި ފިނޭންސް މިނިސްޓްރީގައި އެދިފައިވެ އެވެ.
މާލޭގެ މޭޔަރު ޑރ. މުހައްމަދު މުއިއްޒު މީގެކުރިން ވިދާޅުވީ ފުޑްކޯޓުތަކުގެ ސަބަބުން ވިޔަފާރިއެއް ކުރިއަށް ގެންދަން ބޭނުންވެފައި ތިބި ކަނބަލުންނަށާއި ޒުވާނުންނަށް ރަނގަޅު ފުުރުސަތުތަކެއް ހުޅުވިގެންދާނެ ކަމަށެވެ.
ސިޓީ ކައުންސިލްގެ ވިސްނުން ހުރީ ލޯން ނަގަން މި މަހުގެ ތެރޭގައި ހުއްދަ ލިބިއްޖެނަމަ ލޯން ނެގުމަށް ބޭންކަށް ހުށަހެޅުމަށްފަހު އޭޕްރީލް މަހުގެ ތެރޭގައި މަޝްރޫއު ކުރިއަށް ގެންދިއުމަށް ކޮންޓްރެކްޓަރަކާ ހަވާލުކުރުމަށެވެ.
މުއިއްޒު ވިދާޅުވީ ކައުންސިލުން ބޭނުންވާ ގޮތަށް މަޝްރޫއުގެ މަސައްކަތް ކުރިއަށްދާނަމަ އެންމެ ލަސްވެގެން މިއަހަރުގެ ސެޕްޓެމްބަރު މަހުގެ ތެރޭގައި ފުޑްކޯޓުތައް ހުޅުވާ، ހިދުމަތް ދެވޭނެ ކަމަށެވެ.
މި މަޝްރޫއުގެ ކުރިއަށް ގެންދަވާނެ ކަމަށް މުއިއްޒު އިއުލާން ކުރެއްވީ މާލެ ސިޓީ ކައުންސިލުން ހެންވޭރު އަވަށަށް ނިސްބަތްވާ ރައްޔިތުންނާ އެކު ބޭއްވި ބައްދަލުވުމުގަ އެވެ.