ރާއްޖޭގައި ސްޕޭސް ސައިންސް ކުރިއަރުވާ، އިންސްޓިޓިއުޓް ފޯ ގްލޯބަލް ސަކްސެސް (އައިޖީއެސް) އިން ކުރިއަށްގެންދިޔަ ކެނެޑާގެ ޖޫނިއަ އެސްޓްރޮނޯޓް ޕްރޮގްރާމް ފުރިހަމަކުރި ދަރިވަރުންނަށް އެމެރިކާގެ ޖައްވީ އިދާރާ، ނާސާގައި އިތުރު ތަމްރީނު ހޯދުމުގެ ފުރުސަތު ލިބިގެންދާނެ ކަމަށް އެ އިންސްޓްޓިއުޓް އިން ބުނެފި އެވެ.
އައިޖީއެސް އިން ބުނީ ކެނޭޑިއަން ސްޕޭސް އެޖެންސީގެ ޖޫނިއަ އެސްޓްރޮނޯޓް ޕްރޮގްރާމް ހިންގާފައި ވަނީ މާލެ އާއި ހދ. ކުޅުދުއްފުށީގައި ކަމަށެވެ. ތިން މޮޑިއުލްއަކަށް ބަހާލައިގެން ކުރިއަށްގެންދިޔަ މި ޕްރޮގްރާމްގައި، ސްޕޭސްގައި ފިޓްނަސް ބަހައްޓާނެ ގޮތާއި، ކެއިންބުއިން ކުރިއަށްގެންދާނެ ގޮތާއި ސްޕޭސް ސައިންސާއި ޓެކްނޮލޮޖީ އަދި ޓީމެއްގެ ގޮތުގައި އެސްޓްރޮނޯޓުން ގުޅިގެން މަސައްކަތް ކުރާގޮތް ދަސްކޮށްދީފައިވެ އެވެ.
މި ޕްރޮގްރާމް ފުރިހަމަ ކުރި 32 ދިވެހި ދަރިވަރުންނަށް ކެނޭޑިއަން ސްޕޭސް އެޖެންސީގެ ސެޓްފިކެޓް ހަވާލުކޮށްދެއްވީ އައިޖީއެސްގެ ޗެއާމަން އަދި ސީއީއޯ ރިއްފަތު މުހައްމަދެވެ.
އައިޖީއެސް އިން ބުނީ މި ޕްރޮގްރާމް ފުރިހަމަ ކުރި ދަރިވަރުންނަށް އަންނަ އަހަރު ނާސާގައި އިތުރު ތަމްރީނު ހޯދުމުގެ ފުރުސަތު އެ އިންސްޓްޓިއުޓް އިން ފަހިކޮށްދޭނެ ކަމަށެވެ.
އައިޖީއެސް އިން ކުރިން ވަނީ ރާއްޖޭގެ ފުރަތަމަ ސްޕޭސް ޕްރޮގްރާމް އިފްތިތާހުކޮށްފަ އެވެ. އަދި ރާއްޖޭގެ ފުރަތަމަ ޕްރޮޓޮޓައިޕް ސެޓެލައިޓް ގެ މަސައްކަތް ވެސް ވަނީ ފަށައިފަ އެވެ. މިއީ ދުނިޔެ ހޫނުވުމާއި މޫސުމަށް އަންނަ ބަދަލުތައް ދެނެގަތުމަށް އަޖުމަ ބެލެމުގެ ގޮތުން ހަދާ ސެޓެލައިޓެއް ކަމަށް އެ އިންސްޓްޓިއުޓް އިން ވަނީ ބުނެފަ އެވެ.
އައިޖީއެސްގެ ސްޕޭސް ޕްރޮގްރާމް ކުރިއަށް ގެންދަނީ އެމެރިކާގެ ކޭއެސްއެފް ސްޕޭސް ފައުންޑޭޝަންގެ ފަންނީ އެހީތެރިކަމާއެކުގަ އެވެ. އެ
ޖަމިއްޔާގައި ނާސާ އާއި ޔޫރަޕިއަން ސްޕޭސް އެޖެންސީ (އީސާ) އަދި ސްޕޭސް އެކްސްގެ ތަޖުރިބާކާރުން މަސައްކަތް ކުރެ އެވެ.
