އުފެއްދުންތެރި ވިޔަފާރިތަކަށާއި ޒުވާނުން ވިޔަފާރީގެ ދާއިރާއަށް ނެރުމަށާއި އަލަށް ފަށާ ވިޔަފާރިތަކަށް އެހީތެރިވުމުގެ ގޮތުން ބޭންކް އޮފް މޯލްޑިވްސް (ބީއެމްއެލް) އިން ތައާރަފްކޮށްފައިވާ ސްޓާޓަޕް ގްރާންޓަށް އެދި ހުށަހެޅުމުގެ ފުރުސަތު މިމަހުގެ 16 ވަނަ ދުވަހުގެ ނިޔަލަށް ހަމަވާނެ ކަމަށް އެ ބޭންކުން ބުނެފި އެވެ.
ސްޓާޓް އަޕް ގްރާންޓަށް އެދި ހުށަހަޅަން ޖެހެނީ އީމެއިލް މެދުވެރިކޮށް މިމަހުގެ 16ވާ ބުދަ ދުވަހުގެ ރޭ މެންދުރު 12:00ގެ ކުރިންނެވެ.
ބީއެމްއެލް އިން މިދިޔަ ޖެނުއަރީ މަހު ސްޓާޓަޕް ގްރާންޓް ތައާރަފް ކުރީ ބޭންކްގެ 40 ވަނަ އަހަރީ ދުވަހާ ގުޅުވައިގެންނެވެ.
ގްރާންޓް ސްކީމަށް ހުށަހަޅާ ޕްރޮޕޯސަލްތަކުގެ ތެރެއިން ހަތަރު ފަރާތަކަށް ވިޔަފާރި ފެށުމަށް، ކޮންމެ ވިޔަފާރިއަކަށް ފަސްލައްކަ ރުފިޔާ ދިނުމަށް ހަމަޖެހިފައިވެ އެވެ. މިއީ އަނބުރާ ދައްކަން ނުޖެހޭ ގޮތަށް ހިލޭ އެހީ އެކެވެ.
މި ފުރުސަތަކީ ކޮންމެ ދާއިރާއަކުންވެސް ވިޔަފާރި ފަށަން ބޭނުންވާ އާންމު ފަރުދުންނަށާއި ރަޖިސްޓްރީކުރި ފަހުން އެއް އަހަރު ވެފައި ނުވާ ވިޔަފާރިތަކަށް ހުޅުވާލެވިފައިވާ ފުރުސަތެކެވެ.
ބީއެމްއެލްގެ މެނޭޖާ ޕަބްލިކް ރިލޭޝަންސް މުހައްމަދު ސައީދު ވިދާޅުވީ އަލަށް ވިޔަފާރިއެއް ފެށުމުގެ އިތުރުން ވިޔަފާރި ކުރިއެރުވުމަށްވެސް ނުވަތަ އެހެން ވިޔަފާރިއެއް ފެށުމަށް ބިޒްނަސް ޕްލޭން ވެސް މި ފުރުސަތުގެ ދަށުން ހުށަހެޅިދާނެ ކަމަށެވެ.
"އަޅުގަނޑުމެންގެ އެދުމަކީ ކަނޑައަޅާފައިވާ ސުންގަޑީގެ ކުރިން އީމެއިލް މެދުވެރިކޮށް ހުށަހެޅުން. ހުށަހަޅަން ޖެހޭ ލިޔުންތަކުގެ ތަފްސީލް ވެބްސައިޓްގައި ހިމެނިފައިވާނެ،" ސައީދު ވިދާޅުވި އެވެ.
އޭނާ ވިދާޅުވީ ލިބޭ ހުށަހެޅުންތަކުގެ އިވެލުއޭޝަން ބަހާލާފައިވަނީ ދެ ބަޔަކަށް ކަމަށާއި ފުރަތަމަ އޮންނާނީ ހުށަހަޅާފައިވާ ބިޒްނަސް ޕްލޭންތައް އިވެލުއޭޓް ކުރުން ކަމަށެވެ.
"ބިޒްނަސް ޕްލޭންގައި ހިމަނަންޖެހޭ ތަފްސީލްތައްވެސް އަޅުގަނޑުމެން ވާނީ ވެބްސައިޓްގައި ޝާއިއުކޮށްފައި. ބިޒްނަސް ޕްލޭންތަކުގެ ތެރެއިން އެންމެ ރަނގަޅު 10 ޕްލޭން ހޮވައި އެ ޕްލޭންތަކަށް ޕްރެޒެންޓޭޝަން ހުށަހެޅުމަށް ފުރުސަތު ދެވިގެންދާނެ. މި ޕްރެޒެންޓޭޝަން ހުށަހެޅުމަކީ އިވެލުއޭޝަންގެ ދެވަނަ ބައި. ހުށަހަޅާ ފަރާތްތަކުގެ ތެރެއިން އެންމެ ރަނގަޅު ހަތަރު ޕްރެސެންޓޭޝަން ހޮވިގެންދާނެ." ސައީދު ވިދާޅުވި އެވެ.
ހަތަރު ވިޔަފާރިއަށް ބޭންކް އޮފް މޯލްޑިވްސް އިން މާލީ އެހީތެރިކަން ދިނުމުގެ އިތުރުން ވިޔަފާރީގެ މުހިއްމު މައުލޫމާތުދީ އެހީތެރިކަން ފޯރުކޮށްދިނުމަށް ވެސް ނިންމާފައިވެ އެވެ.
ބީއެމްއެލް ސްޓާޓަޕް ގްރާންޓާ ގުޅޭ އިތުރު މައުލޫމާތު ބޭންކުގެ [ވެބްސައިޓް[(https://www.bankofmaldives.com.mv/startup-grant) އިން ލިބޭނެ އެވެ.