ރީޖަނަލް އެއާޕޯޓްސް ކޮމްޕަނީ ލިމިޓެޑް (އާރްއޭސީއެލް) އިން ހދ. ހަނިމާދޫ އިންޓަނޭޝަނަލް އެއާޕޯޓްގައި އެމަޖެންސީ އެކްސަސައިޒެއް ބާއްވަން ނިންމައިފި އެވެ.
އާރްއޭސީއެލް އިން ބުނީ ހަނިމާދޫ އެއާޕޯޓްގައި އެމަޖެންސީ އެކްސަސައިޒް ހަރަކާތް ބާއްވަން ހަމަޖެހިފައިވަނީ މާދަމާ ރޭ ކަމަށެވެ. މިއީ ފުރަތަމަ ފަހަރަށް ރޭގަނޑު ވަގުތުގައި ރާއްޖޭގައި އެކަހަލަ ހަރަކާތެއް ބޭއްވޭ ފަހަރު ކަަމަށެވެ.
އެ ހަރަކާތުގައި 200 އަށް ވުރެ ގިނަ މީހުން ބައިވެރިވާނެ ކަމަށް އާރްއޭސީއެލް އިން ބުނެ އެވެ. އެގޮތުން އެމްއެންޑީއެފް، ޕޮލިސް، އިމިގްރޭޝަން، އޭވިއޭޝަން ސެކިއުރިޓީ، ކަސްޓަމްސް، ހަނިމާދޫ ހެލްތް ސެންޓަރު، ހަނިމާދޫ ކައުންސިލް އަދި އައިލެންޑް އޭވިއޭޝަނުން ބައިވެރިވެ އެވެ.
ހަނިމާދޫ އިންޓަނޭޝަނަލް އެއާޕޯޓު އަލުން ތަރައްގީކުރުމުގެ މަސައްކަތް ސަރުކާރުން ދަނީ ކުރަމުންނެވެ.
ހަނިމާދޫ އެއާޕޯޓް ތަރައްގީކުރުމުގެ މަޝްރޫއުގެ ދަށުން 2.46 ކިލޯމީޓަރުގެ ރަންވޭއަކާއި އަހަރަކު 1.3 މިލިއަން ޕަސިންޖަރުންނަށް ހިދުމަތް ދެވޭނެ ޖާގައިގެ މުޅިން އާ ޓާމިނަލެއް އިމާރާތް ކުރާނެ އެވެ. އަދި ބައިނަލްއަގްވާމީ ދަތުރުތައް ފުޅާކުރުމަށް ބޭނުންވާ އެހެނިހެން ވަސީލަތްތައް ގާއިމުކުރުމަށްވެސް ހަމަޖެހިފައިވެ އެވެ.
މިމަޝްރޫއު ނިމުމުން ބައިނަލްއަގްވާމީ ދަތުރުތަކުގައި ބޭނުންކުރާ އެއާބަސް އޭ 320 އާއި ބޯއިން 737 މަރުކާގެ ބޯޓު ފަހަރަށް ހަނިމާދޫ އެއާޕޯޓުން ހިދުމަތް ދެވޭނެ އެވެ. އަދި މެދު އިރުމައްޗާއި، ދެކުނު އޭޝިއާ އާއި، ދެކުނު އިރުމަތީ އޭޝިއާ އާއި، އިރުމަތީ އެފްރިކާގެ ގައުމުތަކަށް ސީދާ ދަތުރުތައް ހަނިމާދޫ އަށް އޮޕަރޭޓް ކުރެވޭނެ ކަމަށް އިކޮނޮމިކް މިނިސްޓްރީން މައުލޫމާތުދެ އެވެ.