އޮސްޓްރޭލިއާގެ މަޝްހޫރު ފްރެންޗައިޒް ބްރޭންޑެއް ކަމަށްވާ، "ގްލޯރިއާ ޖީންސް ކޮފީ" ގެ އާ އައުޓުލެޓް އެއް މިރޭ ހުޅުވައިފި އެވެ.
މިއީ "ގްލޯރިއާ ޖީންސް ކޮފީ" ގެ ހަތަރުވަނަ އައުޓްލެޓެވެ. މިފަހަރުގެ އައުޓްލެޓް ހުޅުވާފައިވަނީ ހުޅުމާލެ އަމީން އެވެނިއު ފުރަތަމަ ފަންގިފިލާގަ އެވެ. މިއީ ހުޅުމާލޭގައި ހުޅުވި ދެވަނަ އައުޓްލެޓެވެ. މިވަގުތު އެއާޕޯޓާއި މާލޭގައި ވެލާނާގެ ކުރިމަތީން ވެސް "ގްލޯރިއާ ޖީންސް ކޮފީ" އައުޓްލެޓެއް ހުރެއެވެ. ހުޅުމާލޭގައި ބީޗް އޭރިއާގައި ވެސް އައުޓްލެޓެއް ހުރެއެވެ.
މި އައުޓްލެޓް ހުޅުވައިދެއްވީ މޯލްޑިވްސް ނެޝަނަލް ޕާޓީގެ ލީޑަރު އަދި ދަނގެތީ ދާއިރާގެ މެންބަރު ކާނަލް ރިޓަޔާޑް މުހައްމަދު ނާޒިމް އާއި އެޗްޑީސީގެ ޑެޕިއުޓީ މެނޭޖިން ޑިރެކްޓަރެވެ.
ކޮފީގެ އިތުރުން ތަފާތު ބާވަތްތަކުގެ ކެއުންތައް މި އައުޓްލެޓްވެސް ހެޔޮ އަގެއްގައި ލިބެން ހުންނާނެ އެވެ. އަދި ދިވެހީންގެ މެދުގައި މަގުބޫލް ޗައިނީސް ކެއުންތައް ވެސް މި އައުޓްލެޓުން ލިބެން ހުންނާނެ އެވެ.
އައުޓްލެޓް ހުޅުވުމާއެކު ކަސްޓަމަރުންނަށް ހާއްސަ ޑިސްކައުންޓް ޕެކޭޖްތަކެއް ވަނީ ތައާރަފުކޮށްފައެވެ.
120 މީހުންނަށް އެއް ފަހަރާ ހިދުމަތް ދެވޭ ގޮތަށް ތައްޔާރުކޮށްފައިވާ މި އައުޓްލެޓްގައި އެކި ހަފްލާތައް ބޭއްވުމަށް ފުރުސަތުވެސް ދޭނެ އެވެ. އަދި އޮފީސްތަކާއި ކުންފުނިތަކުގެ މުހިންމު މީޓިންތަކާއި އިވެންޓްތަކަށްވެސް އެތަން ކުއްޔަށް ދޭނެ އެވެ.
ގްލޯރިއާ ޖީންސް ކޮފީއަކީ ދުނިޔޭގެ އެންމެ ޒަމާންވީ އެއް ކޮފީ ޗެއިންނެވެ. ދުނިޔޭގެ 39 ގައުމެއްގައި މި ބްރޭންޑްގެ 800 އަށް ވުރެ ގިނަ އައުޓްލެޓް ހުރެއެވެ.