ރާއްޖޭގެ ފަތުރުވެރިކަމަށް 50 އަހަރުފުރޭތީ އެކަމާ ގުޅިގެން ތައްޔާރުކުރި ރަންޔޫބިލް ލަވަ މިރޭ ލޯންޗްކޮށްފި އެވެ.
މިއުޒިކް ޔޫނިއަން މޯލްޑިވްސް އާއި ޓޫރިޒަމް މިނިސްޓްރީ ގުޅިގެން ތައްޔާރުކޮށްފައިވާ ލަވައިގެ ނަމަކީ "ނަލަ ނަލަ ރާއްޖެ" އެވެ.
ސޯޝަލް ސެންޓަރުގައި މިރޭ މިކަމަށް ހާއްސަކޮށްގެން ބޭއްވި ޝޯގައި ލަވަ ލޯންޗް ކޮށްދެއްވީ ރާއްޖޭގައި ރިސޯޓް މިއުޒިކް ކުޅެމުންދާތާ އެތައް އަހަރެއް ވެފައިވާ މުހައްމަދު މާޖިދު (މެޒޯ މޯޑް)އާއި އަބްދުލް ރަޝީދު (އަބްސީ)އާއި އަދި ނިޝް ނާޝިދެވެ.
މިލަވައިގެ ވީޑިއޯގައި ރާއްޖޭގެ ސަގާފަތާއި ރާއްޖޭގެ ގުދުރަތީ ރީތި ކަން ދައްކުވައިދީފައިވެ އެވެ.
ފަތުރުވެރިކަމަށް 50 އަހަރު ފުރޭ މުނާސަބަަތަށް ހާއްސަކޮށްގެން މިރޭ ވަނީ ދިވެހިންނާއި ބިދޭސީންނަށް ބައިވެރިވެވޭ ގޮތަށް ޓިކްޓޮކް ޗެލެންޖެއްވެސް އިއުލާނުކޮށްފަ އެވެ.
ޓޫރިޒަމް މިނިސްޓްރީން ޓިކްޓޮކް ޗެލެންޖު ހުޅުވާލާފައިވަނީ އަންނަ މަހުގެ 10 ވަނަ ދުވަހުގެ ނިޔަލަށެވެ.
ޓިކޮޓޮކް ޗެލެންޖުގައި ދިވެހިންގެ ކެޓަގަރީގައި 10،000 އަށް ވުރެ ގިނަ ފޮލޯވަރުން އަދި 10،000 ފޮލޯވަރުން ނެތް މީހުންގެ ބައިން އެއްވަނައަށް ދާ ފަރާތަކަށް 25000 ރުފިޔާ، ދެވަނައަށް 15000 ރުފިޔާ އަދި ތިންވަނައަށް 10000 ރުފިޔާގެ އިނާމެއް ދިނުމަށް ނިންމާފައިވެ އެވެ.
ބިދޭސީންގެ ކެޓަގަރީގައި އެއް މިލިއަނަށް ވުރެ ގިނަ ފޮލޯވަރުން އަދި އެއް މިލިއަން ފޮލޯވަރުން ނެތް މީހުންގެ ބައިން އެއްވަނައަށް ހޮވޭ މީހަކަށް ދެ މީހުން ހިމެނޭ ގޮތަށް 8 ދުވަހުގެ ހޮލިޑޭ ޕެކޭޖެއް އަދި ދެވަނައަށް ހޮވޭ ފަރާތަކަށް ދެ މީހަކު ހިމެނޭ ގޮތަށް 5 ދުވަހުގެ ހޮލިޑޭ ޕެކޭޖެއް ދިނުމަށް ޓޫރިޒަމް މިނިސްޓްރީން ނިންމާފައިވެ އެެވެ.