ރޯދަ މަހަށް އަމާޒުކޮށްގެން ދަރިވަރުންގެ ހިތްތަކުގައި ދީނީ ރޫހު އާލާކުރުމުގެ ގޮތުން މުޅި ރާއްޖޭގައި ހާއްސަ ހަރަކާތްތަކެއް ފެށުމަށް ނިންމައިފި އެވެ.
މިހަރަކާތްތައް ފެށުމުގެ ގޮތުން އެޑިޔުކޭޝަން މިނިސްޓްރީގެ އިސްވެރިންނާއި ނެޝަނަލް އިންސްޓިޓިއުޓް އޮފް އެޑިއުކޭޝަން (އެންއައިއީ) ގެ އިސްވެރިން އަދި ރާއްޖޭގެ އެކި ސަރަހައްދުތަކުގައިވާ ސްކޫލުތަކުގެ ޕްރިންސިޕަލުންގެ މެދުގައި އިއްޔެ ވަނީ މަޝްވަރާކުރައްވާ އެވެ.
އެޑިޔުކޭޝަން މިނިސްޓްރީން ބުނީ މި ހަރަކާތްތަކުގެ މަގުސަދަކީ ދަރިވަރުންގެ ހިތްތަކުގައި ދީނީ ހޭލުންތެރިކަން އިތުރުކޮށް އިސްލާމް ދީނާ މެދު ލޯބި އުފެއްދުމާއި، ސްކޫލް މާހައުލުގައި ދަރިވަރުންނަށް ހިންގޭ ހަރަކާތްތަކުގެ ތެރެއިން ދަސްވާ ކޮންމެ ކަމަކީ އާންމު ދިރިއުޅުމުގައި ބޭނުންކުރެވޭ އަދި އާދަކޮށް ކުރާ ކަންކަމަށް ހެދުން ކަމަށެވެ.
ކީ ސްޓޭޖް އެކަކުން ކީ ސްޓޭޖް ފަހެއްގެ ދަރިވަރުންނަށް ރޯދަ މަހާއި، ކީރިތި ގުރުއާނާއި، ފިތުރު އީދާއި އަލްހާ އީދު ފާހަގަކުރުމުގެ މުހިއްމުކަމާއި، ސަލާމްކުރުމުގެ ރިވެތި އާދަ އަށަގެންނެވުމަށް ބާރު އެޅުމާ ގުޅޭ ހަރަކާތްތައް ކުރިއަށް ގެންދާނެ އެވެ.
މީގެއިތުރުން ދަރިވަރުންނަށް ނަމާދުކުރަން ދަސްކޮށްދިނުމާއި، ނަމާދުގައި ކިޔަންޖެހޭ ހުރިހާ އެއްޗެއް ދަސްކޮށްދިނުމާއި، އެ ދަރިވަރަކު ކިޔަވަމުންދާ ގްރޭޑެއްގައި ކިޔަވައިދޭ މިންވަރަށް ގުރުއާން ކިޔެވުމާއި، ރޯދަ މަހާ ގުޅޭ ތަފާތު މަސައްކަތްތައް ދަރިވަރުންނާ ހަވާލުކުރުމަށް ވެސް ނިންމާފައިވެ އެވެ.
ރޯދަ އަށް ހާއްސަކޮށްގެން ހުރިހާ ސްކޫލެއްގައި ހިންގާ ހަރަކާތްތައް ކޯޑިނޭޓް ކުރައްވާނީ އެންއައިއީން ކަމަށްވެސް މިނިސްޓްރީން މައުލޫމާތު ދީފައިވެ އެވެ.