ބެންކް އޮފް މޯލްޑިވްސް (ބީއެމްއެލް) ގެ މުވައްޒަފުން އިސްނަގައިގެން މާލެ ސްވިމިން ޓްރެކް އަދި ހުޅުމާލެ ދެވަނަ ފިޔަވަހީގެ ބީޗް ސަރަހައްދު މިއަދު ސާފުކޮށްފި އެވެ.
ބީއެމްއެލް އިން ބުނިގޮތުގައި މި ހަރަކާތަކީ މުވައްޒަފުން އިސްނަގައިގެން މިމަހުގެ 20 ވަނަ ދުވަހު ދުނިޔޭގައި ފާހަގަ ކުރަމުން އަންނަ އިންޓަނޭޝަނަލް ޑޭ އޮފް ހެޕިނަސްއާ ގުޅުވައިގެން ކުރިޔަށް ގެންދިޔަ ހަރަކާތެއް ކަމަށެވެ. މި ހަރަކާތުގައި ބީއެމްއެލް ގެ 80 އަށްވުރެ ގިނަ މުވައްޒަފުން ބައިވެރިވެފައިވެ އެވެ.
މި ހަރަކާތް ކުރިއަށް ގެންގޮސްފައިވަނީ މިއަދު ހެނދުނު 6:00 އިން ފެށިގެން 9:00 އަށެވެ. މިއީ ސްވިމިން އެސޯސިއޭޝަން އޮފް މޯލްޑިވްސް، ޑައިވް ކްލަބް މޯލްޑިވްސް، ޑައިވް ޑެސްކް އަދި ޕާލޭ އާއި ގުޅިގެން ކުރިއަށް ގެންދިޔަ ހަރަކާތެކެވެ.
ބީއެމްއެލްގެ މެނޭޖާ ޕަބްލިކް ރިލޭޝަންސް މުހައްމަދު ސައީދު ވިދާޅުވި ގޮތުގައި މީގެ ތިން އަހަރު ކުރިން ވެސް ސްވިމިންގް ޓްރެކް ބީއެމްއެލްގެ މުވައްޒަފުން ސާފުކުރި އެވެ. ކުރިއާ އަޅާބަލާއިރު އެތަން ހަޑި ނޫން ނަމަވެސް އަދިވެސް ކޮންމެވެސް ވަރަކަށް ދަޅާއި ޕްލާސްޓިކް ފުޅި މޫދަށް އަޅާފައި ހުންނަ ކަމަށް ވިދާޅުވި އެވެ.
މީގެ އިތުރުން ހުޅުމާލެ ދެވަނަ ފިޔަވަހީގެ ބީޗު ސަރަހައްދުގެ އަތިރިމައްޗާއި ގޮނޑުދޮަށުގައި ގިނަ ޕްލާސްޓިކް ކޮތަޅާއި ފުޅި ހުރި ކަމަށް އޭނާ ވިދާޅުވި އެވެ. ހުޅުމާލެގެ ބީޗް ސަރަހައްދުގެ އެއްބައި މިއަދު ސާފުުކުރެވުނު އިރު 500 ކިލޯގެ ކުނި ނެގި ކަމަށް ވެސް އޭނާ ވަނީ ހާމަކުރައްވާފަ އެވެ.
މި ދެސަރަހައްދުން 755 ކިލޯގެ ކުނި ނަގާފައިވެ އެވެ. މީގެ ތެރެއިން 75 ކިލޯގެ ޕްލާސްޓިކް ރީސައިކަލް ކުރުމަށް ފާލޭއާ ވަނީ ހަވާލުކޮށްފަ އެވެ.