ލަންކާގެ ރައީސް ގޮޓާބޭ ރާޖަޕަކްސާ އާކެބިނެޓް އެލުލަވާ ލައްވަން ފައްޓަވައިފި އެވެ. ޚަބަރުތައް ބުނާ ގޮތުން މިހާތަނަށް ހަތަރު ވަޒީރަކު ވަނީ ހުވާކުރައްވާފަ އެވެ.
ގޮޓާބޭގެ އާކެބިނެޓްގައި، ކެބިނެޓްގައި ކުރިން ތިއްބެވި ވަޒީރުން ވެސް ހިމެނެ އެވެ. އެހެން ނަމަވެސް، ޚަބަރުތައް އެންމެ ބޮޑަށް އަޅައިގެންފައިވާ ވަޒީރަކީ އަލީ ސޮބްރީ އެވެ. އަލީ ސޮބްރީ ކުރިން އަދާކުރެއްވީ ޖަސްޓިސް މިނިސްޓަރުގެ މަގާމެވެ.
އާކެބިނެޓްގައި ހިމެނި ވަޑައިގަންނަވާ ހަތަރު ވަޒީރުންނަކީ،
- އަލީ ސޮބްރީ -- މިނިސްޓަރު އޮފް ފައިނޭންސް
- ދިނޭޝް ގުނަވަރުދަނާ -- މިނިސްޓަރު އޮފް އެޑިޔުކޭޝަންް
- ޕްރޮފެސަރު ޖީއެލް ޕީރީސް -- މިނިސްޓަރު އޮފް ފޮރިން އެފެއާޒް
- ޖޯންސްޓަން ފެނާންޑޯ -- މިނިސްޓަރު އޮފް ހައިވޭސް
ލަންކާ ފިނޭންސް މިނިސްޓަރު މަގާމުގައި ކުރިން ހުންނެވި، ރައީސް ގޮޓަބޭގެ ކޮއްކޮ، ބަސީލް ރާޖަޕަލްސާއަށް އަދި މަގާމެއް ހަވާލު ނުކުރައްވަ އެވެ.
ޚަބަރުތައް ބުނާ ގޮތުން ބަސީލް، ފައިނޭންސް މިނިސްޓަރުގެ ހައިސިއްޔަތުން މި މަހު އަށްވަނަ ދުވަހު ވޮޝިންގްޓަނަށް ވަޑައިގަންނަވާ ގޮތަށް އޮތީ ހަމަޖެހިފަ އެވެ. އެހެން ނަމަވެސް ދެން އެ ދަތުރަށް ވާނެ ގޮތެއް ނޭނގެ އެވެ.
އެޑިޔުކޭޝަން މިނިސްޓަރަކަށް ހަމަޖެއްސެވި ދިނޭޝް ގުނަވަރުދަނާ ކުރިން ވެސް ހުންނެވީ ތައުލީމާ ބެހޭ ވަޒީރުކަމުގަ އެވެ.
ބޮޑުވަޒީރު މަހިންދަ ރާޖަޕަކްސަ ފިޔަވައި ލަންކާ ސަރުކާރުގެ ހުރިހާ ވަޒީރުން ވަނީ އިސްތިއުފާ ދެއްވާފަ އެވެ. ގައުމަށް ދިމާވެފައި އޮތް އިގުތިސޯދީ ދަތި ހާލަތަށް ސަރުކާރު ޒިންމާދާރު ކުރުވުމަށް އާންމުން މަގުތަކަށް ނުކުމެ ހިންގަމުން ގެންދާ ހަމަނުޖެހުންތައް މައިރިތި ކުރުމަށް އޮތް ހައްލަކީ ސަރުކާރު އިސްތިއުފާ ދިނުން ކަމަށް މުޒާހަރާކުރާ މީހުން ގެންދަނީ ގޮވަމުންނެވެ.
ލަންކާ މަގުތަކުގައި މުޒާހަރާކުރާ މީހުން ސަރުކާރުގެ އަމުރަށް ކިޔަމަން ނުވެ، މުޒާރަހާ ވަރުގަދަ ކުރާނެ ކަމަށް ވަނީ އިންޒާރުދީފަ އެވެ. މުޒާހަރާކުރާ މީހުން މިހާރު ގޮވާލަނީ ލަންކާގައި މުޅިން އާސަރުކާރެއް އެކުލަވާލުމަށެވެ.