ފުވައްމުލަކު ސިޓީގެ ބަނދަރަށް ވަންނަ ސަފާރީތަކުން ނަގާ ފީ ބޮޑު ކުރުމަށް ނިންމާފައިވާ ނިންމުމަށް އަމަލު ކުރަން ފަށައިިފި އެވެ.
ފުވައްމަލު ބަނދަރަށް ވަންނަ ސަފާރީތަކުން ނަގާ ފީ ބޮޑު ކުުރުމަށް އެ ސިޓީގެ ކައުންސިލުން މަޝްވަރާކޮށް ގޮތްތަކެއް ނިންމީ ޖަނަވަރީ 12 ވަނަ ދުވަހު އެވެ. އެ ދުވަހު ނިންމީ ސަފާރީތަކުން ދުވާލަކަށް ނަގާ ފީ 500 ޑޮލަރަށް ބޮޑު ކުރުމަށެވެ. ކުރީން ނަގަމުން އައީ ދުވާލަކަށް 50 ޑޮލަރެވެ.
ސިޓީ ކައުންސިލުން ކުރި އިއުލާނެއްގައި ބުނީ އެ ކައުންސިލުން ނިންމާފައިވާ ނިންމުން ތަންފީޒު ކުރަން ފަށާފައިވާ ކަމަށެވެ. އެ ގޮތުން މި މަހުގެ ފުރަތަމަ ދުވަހުން ފެށިގެން އެ ސިޓީގެ ބަނދަރަށް ވަންނަ ކޮންމެ ސަފާރީއަކުން ދުވާލަަކަށް 500 ޑޮލަރު ނަގާނެ ކަމަށެވެ.
އެ ނިންމުމަކީ ބަނދަރުގެ ޖާގައިގެ ދަތިކަމާއި އަދި ބަނދަރުން ލިބޭ އާމްދަނީ އިތުރު ކުރުމަށް ނިންމި ނިންމުމެކެވެ.
ފުވައްމަލު ބަނދަރަށް ވަންނަ ސަފާރީތަކުން ނަގާ ފީ ބޮޑު ކުުރުމުން ބޯޓިން އެސޯސިއޭޝަން އިން ވަނީ ކަންބޮޑުވުން ފާޅުކޮށްފައެވެ. އެ އެސިއޭޝަނުން ބުނީ ހަމައެކަނި ސަފާރީތަކުން ނަގާ ފީ ބޮޑު ކުރުމަކީ ކަންބޮޑުވާ ކަމެއް ކަމަށެވެ. ރަށްރަށަށް އާމްދަނީ ލިބޭ މިންވަރު އިތުރުކުރުމަށް ނިންމާ ނިންމުންތަކަށް އިހުތިރާމް ކުރާ ކަމަށާ ނަމަވެސް ހަމަހަމަ ކަމެއް ނެތި ތަފާތު ކުރުން ގެންގުޅެވޭ އުސޫލުން ނިންމާ ނިންމުންތަކާއިމެދު ކަންބޮޑުވާ ކަމަށެވެ.