ހުޅުމާލެ ފޭސް އެކަކާ ދޭއް ގުޅުވައިދޭ ބްރިޖްތައް އަޅާނެ ބަޔަކު ހޯދަން އިންޓަނޭޝަނަލް ބިޑަށް އިއުލާން ކުރަން ނިންމާފައިވާ ކަމަށް ހުޅުމާލެ ހައުސިން ޑިވޮލޮޕްމަންޓް ކޯޕަރޭޝަން (އެޗްޑީސީ) އިން ބުނެފި އެވެ.
ހުޅުމާލެ ތަރައްގީ ކުރުމަށް އެޗްޑީސީން މިހާރު ކުރިއަށްގެންދާ ބައެއް މަޝްރޫއުތަކާ ގުޅޭ ގޮތުން އަވަސްއަށް ދެއްވި އިންޓަވިއުއެއްގައި މެނޭޖިން ޑިރެކްޓަރު އަހުމަދު ސައިމަން ވިދާޅުވީ، ދެ ފޭހުގެ ބިން ގުޅުވައިދޭ ބްރިޖްތައް އެޅުމުގެ މަސައްކަތަކީ ރާއްޖެއަށް މުޅިން އާ މަސައްކަތަކަށް ވާތީ އެކަން ކުރަން ބޭރުގެ ތަޖުރިބާކާރުންގެ އެހީ ބޭނުންވާ ކަމަށެވެ. އެގޮތުން ބޭނުންވާ ފަންނީ އެހީއާ، ޕްރޮޖެކްޓާ ބެހޭގޮތުން ހޯދަން ބޭނުންވާ އެކި ލަފާ ހޯދަން ބޭރުގެ ކޮންސަލްޓެންޓުން ހޯދުމުގެ މަސައްކަތް މިހާރު ކުރަމުން އަންނަ ކަމަށެވެ.
ހުޅުމާލޭގެ ދެވަނަ ފޭހުގެ ޑިވެލޮޕްމަންޓް ޕްލޭންގައިވާ ގޮތުން އެ ދެ ބިން ދެމެދުގައި 50 މީޓަރުގެ ވޯޓާވޭއެއް އޮވެ އެވެ. އަދި ފޭސް އެކަކާ ދޭއް ގުޅުވާލަނީ އެ ވޯޓާ ވޭގެ މަތިން ދެފަރާތް ގުޅުވާލާ އަށް ބްރިޖަކުންނެވެ. އެ މަޝްރޫއަށް ހަރަދުކުރަން 80 މިލިއަން ޑޮލަރުގެ ލޯނެއް ސައޫދީ ސަރުކާރުން ރާއްޖެއަށް ދޫކޮށް އެއްބަސްވުމުގައި ސޮއިކުރީ މިދިޔަ ސެޕްޓެމްބަރު 14 ގަ އެވެ.
ސައިމަން ވިދާޅުވީ، ފޭސް އެކަކާއި ދޭއް، ކުދި ބްރިޖްތަކަކުން ގުޅުވައިލާއިރު، ފޭސް އެކެއްގައި އަޅާފައިވާ ރޯޑް ނެޓްވޯކްތައް ވެސް ދެވަނަ ފޭހާ ގުޅުވައިލާނީ އެ ބްރިޖް ތަކުގެ ތެރެއިން ކަމަށެވެ. ތަފާތު، އަދި ރާއްޖެއަށް މުޅިން އާ މަސައްކަތެއް ކުރާއިރު، މަސައްކަތް ކުރުވަން ބޭނުންވަނީ އެންމެ ގާބިލު މީހުންނާ ހަވާލުކޮށްގެން ކަމަށާއި، އިންޓަނޭޝަނަލް ބިޑަކަށް ދާން ނިންމީ ވެސް އެ ސަބަބާ ހެދި ކަމަށެވެ.
"ހުޅުމާލެ ފޭސް ވަން އާ ފޭސް ޓޫ އެއްކޮށްލާއިރު އެ ދެމެދުގައި އަޅަން އެބަޖެހޭ ގާތްގަނޑަކަށް އަށް ބްރިޖް. އެ އަށް ބްރިޖް އަޅާނީ 50 މީޓަރުގެ ވޯޓާ ވޭ އެއްގެ މަތިން. މޫދުން އެގޮތަށް ފެން ދައުރުވަމުންދާއިރު މަގުތައް ކަނެކްޓް ކުރެވިފައި ހުންނާނީ ބްރިޖް ތަކުގެ ތެރެއިން. މި މަސައްކަތްތަކަކީ އަޅުގަނޑުމެންނަށް މުޅިން އާ މަސައްކަތްތަކަކަށް ވާތީ އެކްސްޕާޓުން ހޯދަން ޖެހޭ. މިކަން ކުރަން އަޅުގަނޑުމެން ބޭނުންވަނީ އެންމެ ބެސްޓް މީހުން،" ސައިމަން ވިދާޅުވި އެވެ.
ހެރިޓޭޖް އައިލެންޑްގެ ގޮތުގައި ހުޅުމާލެ ދެވަނަ ފޭސްގައި ތަރައްގީކުރާ ފަރުކޮޅުފުއްޓަކީ ވެސް ބްރިޖް ގެ ޒަރީއާއިން ގުޅުވައިލާ ގޮތަށް ޕްލޭންކޮށްފައިވާ ރަށެކެވެ. ދެވަނަ ފޭސްގެ މައި ބިމާއި ފަރުކޮޅުފުއްޓާ ދެމެދުވެސް ވޯޓާވޭ އެއް ބާއްވާއިރު، އެ ދެ ތަން ގުޅުވުމަށް ވެސް ދެ ބްރިޖް އަޅާނެ އެވެ.
"މި މަސައްކަތްތަކަކީ މިހާރު ފައިސާ ލިބިފައިވާ މަސައްކަތްތަކެއް ކަމަށް ވާތީ އަމަލީ މަސައްކަތް ވަރަށް އަވަހަށް ފެށޭނެ" ކަމަށް ސައިމަން ވިދާޅުވި އެވެ.
މީގެ އިތުރުން، ހުޅުމާލެ ދެވަނަ ފޭސްގެ ތަރައްގީއަށް ސައޫދީ ސަރުކާރުން ދިން ލޯނު އެހީގެ ދަށުން މިހާރު ހިއްކާފައިވާ ބިން ހިމާޔަތްކުރުމަށް އެ ބިމުގެ ވަށައިގެން ޝީޓް ޕައިލް ކުރުމުގެ މަސައްކަތްވެސް ކުރަމުން އަންނަ ކަމަށް ވެސް ސައިމަން ވިދާޅުވި އެވެ. އަދި ވިދާޅުވީ، އަންނަ އަހަރުގެ ކުރީ ކޮޅު ޝީޓް ޕައިލް ކުރުމުގެ މަޝްރޫއު އަމަލީ ގޮތުން ފަށާނެ ކަމަށެވެ.
ހުޅުމާލޭގެ ދެ ވަނަ ފިޔަވަހީގެ ބިން ހިއްކުމުގެ މަސައްކަތުގެ ތެރެއިން --