އިންޑިއާގެ މުސްލިމުންނާ ދެކޮޅަށް އެ ގައުމުގެ ސަރުކާރުން ހިންގާ ލާއިންސާނީ އަމަލުތަކާ ދެކޮޅަށް ދިވެހި ސަރުކާރުން އަޑު އުފުލައި، މި މައްސަލަ ބައިނަލްއަގްވާމީ ސަމާލު ކަމަށް ގެންދަން އިސް ނަގަން ދިވެހި ސަރުކާރަށް ގޮވާލާ ހުށަހެޅި ކުއްލި މައްސަލަ މަޖިލީހުގެ ޖަލްސާ އަށް އެޖެންޑާ ކުރަން ފުރުސަތެއް ނުދިނެވެ.
މަޖިލީހުގެ މިއަދުގެ ޖަލްސާއަށް އެ މައްސަލަ ހުށަހެޅުއްވީ އިދިކޮޅު ޕީޕީއެމްގެ ނައިބު ރައީސް އަދި ނައިފަރު ދާއިރާގެ މެންބަރު އަހްމަދު ޝިޔާމް އެވެ.
ކުއްލި އެ މައްސަލައިގައި ބުނެފައިވަނީ އިންޑިއާގެ ބައެއް ސްޓޭޓް ތަކުގައި ބޮޑު ވަޒީރު ނަރެންދުރަ މޯދީގެ ސަރުކާރުން ވަކިވަކި މުސްލިމުންގެ އާއިލާތަކަށް އަނިޔާކޮށް، މުސްލިމުންގެ ގެދޮރަށް ގެއްލުންދީ ސުންނާފަތި ކުރަމުންދާ ކަމަށެވެ. އިންޑިއާގައި މުސްލިމުން ކުރާ ވިޔަފާރިތައް ހަލާކުކޮށް ފިހާރަތަކަށް ބޮޑެތި ގެއްލުންދީ މުސްލިމުން ދިރިއުޅެމުންދާ ތަންތަން ބުލްޑޯޒަރު ބޭނުން ކޮށްގެން ބިމާ ހަމަކުރަމުންދާ ކަމަށްވެސް ފާހަގަ ކޮށްފައިވެ އެވެ.
މީގެ އިތުރުން އިންޑިއާގައި މިސްކިތްތަކާއި މުސްލިމުންގެ ގެދޮރުގެ ހުރުމަތް ކަނޑާ ގެއްލުން ދިނުމުގެ ގޮތުން ހަރުކަށި ހިންދޫ ޖަމާއަތްތަކުން ހިންގާ އަނިޔާވެރި އަމަލުތަކުގައި އިންޑިއާގެ ސަރުކާރާއި ފުލުހުން ބައިވެރިވެ ހިތްވަރު ދެމުން ގެންދާ ކަމަށާއި މުސްލިމުންގެ ހައްގުތަކަށް އަރައިގަނެ އިންސާނީ ހައްގުތަކުން މަހްރޫމް ކުރަމުންދާއިރު ދިވެހި ސަރުކާރުން މި މައްސަލައިގައި ހަނުއޮތުމުން ދިވެހި ރައްޔިތުންގެ ކަންބޮޑުވުން އިންތިހާއަށް އެބައޮތް ކަމަށް ބުނެފައިވެ އެވެ.
"... މިމައްސަލައިގައި ދިވެހި ސަރުކާރުން އިންޑިއާގެ މުސްލިމުންގެ ހައްގުގައި ބަސް ބުނެ މިކަން ކުށްވެރި ކުރުމަށާއި މި މައްސަލަ ދުނިޔޭގެ ސަމާލުކަމަށް ގެނައުމަށް ރާއްޖެއިން އިސްނެގުމަށް ދިވެހި ސަރުކާރަށް ގޮވަލާ ރައްޔިތުންގެ މަޖިލީހުގެ ގަވައިދުގެ 170 ވަނަ މާއްދާގެ ދަށުން މި ކުއްލި މައްސަލަ ހުށަހަޅަމެވެ." މައްސަލައިގައި ވެ އެވެ.
މައްސަލަ ހުށަހެޅުއްވުމަށް ފުރުސަތު ނުދެއްވި ބައެއް ސަބަބުތައް މަޖިލީހުގެ މިއަދުގެ ޖަލްސާގައި މަޖިލީހު ރައީސް މުހައްމަދު ނަޝީދު ވިދާޅުވެ ދެއްވެވި އެވެ. އެގޮތުން ފުރަތަމަ ކަމަކަށް ވިދާޅުވީ އެ މައްސަލައަކީ މަޖިލީހުގެ ގަވައިދުގައި ބުނާ ފަދަ ކުއްލި މައްސަލައަކަށް ނުވާތީ ކަމަށެވެ.
ނަޝީދު ވިދާޅުވީ ދެކުނު އޭޝިއާގެ ގައުމުތަކުގައި ނަސްލުތަކާއި ދީންތައް އެއް ހަމައަކަށް، އެއް މަސްލަހަތަކަށް އެ ބުރޭން މަސައްކަތް ކުރާތާ 1800 އަހަރު ވެއްޖެ ކަމަށެވެ. އެ ހަގީގަތް އެހެން އޮތުމުން މިއަދު ކުއްލި އަކަށް އަވަށްޓެރި ގައުމުތަކުގެ ދާހިލީ ކަންކަމާ ގުޅޭ ގޮތުން މަޖިލީހުގައި ބަހުސް ކުރަން ފުރުސަތު ދޭން ފެނިވަޑައިނުގަންނަވަނީ ކަމަށެވެ.
"އަދި އަޅުގަނޑު ދެކޭ ގޮތުގައި އެއީ މި މަޖިލީހުގެ ގަވައިދު ވެސް ޑިމޮކްރެޓިކް އުސޫލުތައް ވެސް އަދި އަޅުގަނޑުމެން ބަލައިގަނެފައިވާ ހަމަތައް ވެސް ތަންދޭ ކަމެއް ނޫން،" ނަޝީދު ވިދާޅު ވިއެވެ.