މި އަހަރުގެ ބައި ބަލާ މުބާރާތް ވަޅު އީދު ދުވަހު - މާދަމާ - ފެށުމަށް ނިންމި ނިންމުން ބަދަލުކޮށް މުބާރާތް ފެށުން ފަސްކޮށްފި އެވެ.
މި އަހަރުގެ މުބާރާތް ފަސް ކުރީ ދިވެހި ފުލުހުންގެ ހިދުމަތުން އެކަމަަށް އެދިގެން ކަމަަށް އެނގިފައިވެއެވެ. ފުލުހުން އެކަމަށް އެދުނީ ރޭ ފަތިހު އަދި މިއަދު ހެނދުނު މާލެ ސިޓީގައި ހިނގި މާރާމާރީތަކާ ގުޅިގެން ކަމަށްވެސް އެނގިފައިވެއެވެ.
މުބާރާތް ފަސްކުރަން ނިންމީ ބައިބަލާ އެސޯސިއޭޝަންއާ ފުލުހުންނާ އެކު ދެންމެ ބޭއްވި ބައްދަލްވުމަށް ފަހު އެވެ. އެކަން އެ ދެ ފަރާތުގެ އިސް ބޭފުޅަކު ޔަގީން ކޮށްދިނެވެ. ނަމަވެސް ދެ ފަރާތުން ވެސް ރަސްމީ ކޮމެންޓެއް ނުދެއެވެ.
ބައިބަލާ އޮފިޝަލަކު ވިދާޅުވީ އެކަމާ ގުޅޭ ސްޓޭޓްމަންޓެއް ނެރެން ތައްޔާރުވަމުންދާ ކަމަށެވެ.
ދެ އަހަރުގެ މެދުކެނޑުމަކަށް ފަހު މި އަހަރު ބައިބަލާ މުބާރާތް ބާއްވަނީ "އެމްޓީސީސީ ބައިބަލާ ޗެލެންޖް" ނަމުގައެވެ. މުބާރާތުގެ ޓައިޓަލް ސްޕޮންސާއަކީ އެމްޓީސީސީ އެވެ.
ބައިބަލާ އެސޯސިއޭޝަނުން ބުނީ މި އަހަރުގެ މުބާރާތުގައި 34 ޓީމް ވާދަކުރާނެ ކަމަށެވެ. ޖުމްލަ 1،000 ކުޅުންތެރިން ފެންނާނެ އެވެ.
މުބާރާތް ކުރިއަށް ދާނީ މި މަހުގެ ތިންވަނަ ދުވަހުން ފެށިގެން ހަތްވަނަ ދުވަހުގެ ނިޔަލަށް ދޮންގަނޑު ބީޗްގައެވެ.
ފިތުރު އީދާ ގުޅިގެން ބާއްވާ އެންމެ ބޮޑު ކުޅިވަރު ހަރަކާތަކީ ބައިބަލާ މުބާރާތެވެ. މުބާރާތަށް ޓީމުތަކުން ދަނީ ފޯރީގައި ފަރިތަކުރަމުންނެވެ. މާލޭގެ އެކި ސަރަހައްދުތަކުގައި ބައިބަލާ ޕިޗްތައް ތައްޔާރުކޮށް ޓީމުތަކުން ޕްރެކްޓިސް ކުރާތާ ދެ ހަފްތާއެއްހާ ދުވަސް ވެއްޖެ އެވެ.