އިންޑިއާ ސިފައިން ބޭލުމަށް ގޮވާލާ "އިންޑިއާ އައުޓް" ބެނާ ދެމި ގޭގޭގެ ވެރީން ފުލުހަށް ހާޒިރުވާން އަންގައިފި އެވެ.
އިދިކޮޅު ކޯލިޝަންގެ ތަރުޖަމާން ހީނާ ވަލީދު ވިދާޅުވީ "އިންޑިއާ އައުޓް" ލިޔެފައިވާ ބެނާ ދެމި މައްސަލާގައި ޕީޕީއެމް އޮފީސް ހުންނަ އިމާރާތުގެ ވެރިފަރާތަށް ފުލުހަށް ހާޒިރުވާން އަންގާފައިވާ ކަމަށެވެ. އަދި ގ. ހޭޅި ގޭގައި ބެނާ ދެމުމުން އެ ގޭގެ ވެރިފަރާތްވެސް ފުލުހަށް ހާޒިރުވާން އަންގާފައިވާ ކަމަށެވެ.
ޕީޕީއެމް އޮފީސް ހިންގާ ހ. ހުރަފާ ގޭގެ ވެރިފަރާތަށް ފުލުހަށް ހާޒިރުވާން އަންގާފައިވަނީ މެންދުރު ފަހު 2:30 އަށެވެ. ގ. ހޭޅި ގޭގެ ވެރިފަރާތް ހާޒިރުވާން އަންގާފައިވަނީ މިއަދު ހަވީރު 5:00 އަށެވެ.
އިދިކޮޅު ކޯލިޝަނުން ބޮޑުކޮށް ފުޅާކޮށްފައި އޮތް "އިންޑިއާ އައުޓް" ކެމްޕެއިންގެ ދަށުން "އިންޑިއާ އައުޓް" ލިޔެފައިވާ ބޮޑެތި ބެނާތައް ފުރަތަމަ ދެމީ ޕީޕީއެމްގެ އޮފީސް ހިންގާ އިމާރާތުގަ އާއި ކުރީގެ ރައީސް އަބްދުﷲ ޔާމީންގެ ގެކޮޅު ހ. ދޫވެހީގައެވެ. އެ ދެ އިމާރާތުގައިވެސް 40 ފޫޓްގެ ބޮޑު ދެ ބެނާ ދެމި އެވެ.
ނަމަވެސް "އިންޑިއާ އައުޓް" ކެމްޕެއިނަކީ ގައުމީ ސަލާމަތަށް ނުރައްކާތެރި ހަރަކާތެއް ކަމަށް ސަރުކާރުން ކަނޑައެޅުމުން ފުލުހުން ވަނީ އެ ދެ ބެނާވެސް ނަގާފައެވެ. އޭގެ ފަހުން ސްޕެލިން ބަދަލުކޮށްގެން މާލޭގެ އެކި ސަރަހައްދުތަކުގައި "އިންޑިއާ އައުޓް" ބެނާ ދެމި އެވެ. އެ ބެނާތައްވެސް ފުލުހުން ވަނީ ނަގާފައެވެ.
ފަހުން ބެނާތައް ދަމަނީ އިންޑިއާ ގެ ދިދަ ކުރަހާ އޭގެ މަތީގައި "އައުޓް" ލިޔެގެންނެވެ. ނަމަވެސް އެއީވެސް ރައީސްގެ ގަރާރާ ހިލާފް އަދި ކޯޓުން އެ މައްސަލާގައި ނެރެފައި އޮތް އަމުރަށް ގޮންޖެހުމުގެ އަމަލެއް ކަމަށް ކަނޑައެޅުމުން އެ ބެނާތައްވެސް ފުލުހުން ވަނީ ނަގާފައެވެ.
"އިންޑިއާ އައުޓް" ބެނާތައް ނަގަން ފުލުހުން ކޯޓް އަމުރެއް ހޯދީ އެއް ރެއެއްގެ ފަތިހުއެވެ.