މިދިއަ އަހަރު ފުލުހުންނަށް ހުށަހެޅުނު ގޭންގު މާރާމާރީގެ އަދަދު 27 ޕަސެންޓް ދަށަށް ގޮސްފައިވާ ކަމަށް ހިސާބުތަކުން ދައްކައިފި އެވެ.
ފުލުހުން އާންމުކޮށްފައިވާ ތަފާސް ހިސާބުތައް ދައްކާ ގޮތުގައި ވޭތުވެދިޔަ އަހަރަކީ ފުލުހުންނަށް ހުށަހެޅުނު މައްސަލަތަކުގެ އަދަދު ވޭތުވެދިޔަ 10 އަހަރުގެ ތެރޭގައި އެންމެ ދަށަށް ދިޔަ އަހަރެވެ.
ކުށުގެ ތަފާސް ހިސާބަކީ ފުލުހުންނަށް ހުށަހެޅޭ މައްސަލަތަކުން ނެގޭ ހިސާބު ތަކެކެވެ. ފުލުހުންނަށް ހުށަހެޅޭ ހުރިހާ މައްސަލައަކީ އޭގައި ކުށް އެކުލެވޭ މައްސަލަތަކެއް ނޫންނެވެ. އެހެންކަމުން ކުށުގެ ތަފާސް ހިސާބުގެ ގޮތުގައި ގުނަނީ ކުށުގެ އަމަލެއް އެކުލެވޭ މައްސަލަތައް އެކަންޏެވެ.
ތަފާސް ހިސާބުތައް ދައްކާ ގޮތުގައި، ގޭންގު މާރާމާރީގެ އަދަދު 27 ޕަސެންޓް ދަށަށްދިޔައިރު ވައްކަމުގެ މައްސަލަތައް 22 ޕަސެންޓަށް ދަށަށް ގޮސްފައިވެއެވެ.
ފޭރުމުގެ މައްސަލަތައްވެސް ވަނީ ދަށަށް ގޮސްފައެވެ. ހާއްސަކޮށް ހަތިޔާރު ބޭނުންކޮށްގެން ފޭރުމުގެ މައްސަލަތައް 27 ޕަސެންޓަށް ދަށަށް ގޮސްފައިވާ ކަމަށް ހިސާބުތަކުން ދައްކައެވެ.
ވޭތުވެދިޔަ އަހަރު ފުލުހުންނަށް ހުށަހެޅުނު މައްސަލަތަކުގެ ތެރެއިން 33 ޕަސެންޓް މައްސަލަ ދައުވާ ކުރަން ފޮނުވާފައިވެ އެވެ. އެއީ 2014 ވަނަ އަހަރާ ބަލާފައި ދެ ގުނައިގެ ކުރިއެރުމެކެވެ. މިދިޔަ އަހަރު ދައުވާ ކުރަން ފޮނުވުނު މައްސަލަތަކުގެ އަދަދު ވަނީ އޭގެ ކުރީ އަހަރަށްވުރެ 63 ޕަސެންޓް ދަށަށް ގޮސްފައެވެ.
ގެވެށި އަނިޔާގެ މައްސަލަތައް ހުށަހެޅުނު މިންވަރު އިތުރުވެފައިވާ ކަމަށް ފުލުހުން ބުނެއެވެ. އެއީ ވޭތުވެދިޔަ އަހަރު ހިނގި ބައެއް ހިތާމަވެރި ހާދިސާތަކާއި ގުޅިގެން މިފަދަ މައްސަލަތައް ރިޕޯޓްކުރުމަށް ބާރުއަޅައި ހިންގުނު ތަފާތު ހަރަކާތްތަކުގެ ސަބަބުންކަމަށް ބެލެވޭ ކަމަށް ހިސާބުތަކުން ދައްކަ އެވެ.
މާލޭގައި ހިނގި ބޮޑު މާރާމާރީއެއްގައި ވަޅި ހަރައި ޒަހަމްކޮށްލި މީހެއްގެ ގައިން ލޭ އޮހޮރިފައި: -- ފައިލް ފޮޓޯ | އަވަސް