ބޯހިމެނުމުގެ މަސައްކަތަށް ބޭނުންވާ މީހުން ހަމަވެފައި ނުވާތީ އެމަސައްކަތުގައި އުޅުމަށް ޝައުގުވެރިވާ ފަރާތްތަކުން ކުރިމަތިލުމަށް އިތުރު ވަގުތު ދީފި އެވެ.
މޯލްޑިވްސް ބިއުރޯ އޮފް ސްޓެޓިސްޓިކްސް (އެމްބީއެސް) އިން މިއަހަރު ކުރިއަށް ގެންދިއުމަށް ހަމަޖެހިފައިވާ ބޯހިމެނުމުގެ ޕްރޮގްރާމްގައި ހަރަކާތްތެރިވާނެ އޮފިޝަލުން ހޯދުމުގެ މަސައްކަތް ފެށީ ފެބްރުއަރީ މަހުގެ ދެވަނަ ހަފްތާގެ ތެރޭގަ އެވެ. އެ ފުރުސަތު އޭރު ހުޅުވާލީ މިދިޔަ މެއި މަހުގެ ނިޔަލަށެވެ.
މުއްދަތު ހަމަވިއިރު އަދިވެސް އިތުރު އޮފިޝަލުން ބޭނުންވާތީ އެމަސައްކަތުގައި ބައިވެރިވުމަށް ޝައުގުވެރިވާ ފަރާތްތަކުން ކުރިމަތިލުމަށް މިހާރު ވަނީ މި މަހުގެ 12 ވަނަ ދުވަހުގެ ނިޔަލަށް އިތުރު ވަގުތު ދީފަ އެވެ.
އެމްބީއެސް އިން ހޯދަނީ 4،300 އެނިއުމަރޭޓާސް އާއި 100 ޓްރެއިނާސް އެވެ.
ނިއުމަރޭޓަރުން ތަމްރީން ކުރުމަށް މަސައްކަތް ކުރާ ޓްރެއިނަރުންނަށް މަސައްކަތް ކުރާ ކޮންމެ ދުވަހަކަށް 500 ރުފިޔާ އަދި ތަމްރީން ހޯދާ ނިއުމަރޭޓަރުން ތަމްރީންތަކުގައި ހޭދަކުރާ ކޮންމެ ދުވަހަކަށް 100 ރުފިޔާ ދިނުމަށް ހަމަޖައްސާފައިވެ އެވެ. މީގެއިތުރުން ބޯހިމެނުން ކުރިއަށްދާއިރު ސީދާ އެ މަސައްކަތުގައި އަމަލީ ގޮތުން ބައިވެރިވާ ކޮންމެ ނިއުމަރޭޓަރަކަށް ކޮންމެ ދުވަހަކަށް 500 ރުފިޔާގެ އެލަވަންސަކާއި ކޮންމެ ދުވަހަކަށް ފން އެލަވަންސްގެ ގޮތުގައި 10 ރުފިޔާ ދިނުމަށްވެސް ނިންމާފައިވެ އެވެ.
ބޯހިމެނުމުގައި ހަރަކާތްތެރިވާ ނިއުމަރޭޓަރުން އަތޮޅު ތެރޭގައި ތަމްރީން ކުރުމަށް ހަމަޖެހިފައިވަނީ ކުރިއަށް އޮތް ޖުލައި މަހާއި އޮގަސްޓް މަހު އެވެ. މާލޭގައި ތަމްރީން ޕްރޮގްރާމު ކުރިއަށް ގެންދިއުމަށް ނިންމާފައިވަނީ މިއަހަރުގެ އޯގަސްޓް އަދި ސެޕްޓެމްބަރުގަ އެވެ.
ބޯހިމެނުމުގައި ބޭނުންކުރާ ސުވާލު ކަރުދާސްތައް ޓެސްޓް ކުރުމުގެ މަސައްކަތް ވެސް އެމްބީއެސް އިން މިހާރު ކޮށްފަ އެވެ.
ބޯހިމެނުން ކުރިއަށް ގެންދިއުމަށް ނިންމާފައިވަނީ މިއަހަރުގެ ސެޕްޓެމްބަރު 17 އިން 30 އަށެވެ. ބޯހިމެނުމުގެ ވަގުތީ ނަތީޖާ މިއަހަރުގެ އޮކްޓޫބަރު ހަވަނަ ދުވަހު އިއުލާންކުރުމަށް ހަމަޖެހިފައިވާއިރު ދާއިމީ ނަތީޖާ އެ މަހުގެ 20 ވަނަ ދުވަހު އިއުލާން ކުރާނެ އެވެ.
ރައީސް މުހައްމަދު ނަޝީދުގެ ވެރިކަމާއެކު ބޯހިމެނުން މެދުކެނޑުމަށްފަހު ރާއްޖޭގައި އެންމެ ފަހުން ބޯހިމެނީ 2014 ވަނަ އަހަރު އެވެ. އެ އަހަރު މުޅި ރާއްޖޭގައި ކުރިއަށް ގެންދިޔަ ބޯހިމެނުމުގެ ނަތީޖާ ދައްކާ ގޮތުގައި އޭރު ރާއްޖޭގައި ދިރިއުޅޭ މީހުންގެ އާބާދީ އަކީ 402،071 އެވެ. މިހާރު ރާއްޖޭގެ އާބާދީ ސީދާ އަދަދު މުޅީން ސާފު ނުވާއިރު ބިދޭސީންގެ އަދަދުވެސް ސާފެއް ނުވެ އެވެ.