އަލްހާ އީދު ދުވަހާއި ވަޅު އީދު ދުވަހު ވަކި ވަގުތުތަކެއްގައި މާލެ ސިޓީގައި ވެހިކަލް ދުއްވުން މަނާ ކުރުމަށް މާލެ ކައުންސިލުން ނިންމައިފި އެވެ.
މާލެ ސިޓީ ކައުންސިލްގެ މި ދައުރުގެ 59 ވަނަ ރަސްމީ އާއްމު ޖަލްސާގައި މިއަދު ނިންމާފައިވަނީ އީދު ދުވަހާއި ވަޅު އީދު ދުވަހު ހަވީރު 4:00 އިން އިރުއޮއްސި 6:00 އަށް ވެހިކަލް ދުއްވުން މަނާ ވަގުތެއްގެ ގޮތުގައި ހަމަޖެއްސުމަށެވެ. އެހެން ފަހަރުތަކެކޭ އެއްގޮތަށް މިފަަހަރުވެސް މި ވަގުތުތަކުގައި ހާއްސަ ހުއްދައިގެ ދަށުން މާލޭގައި ވެހިކަލް ދުއްވޭނެ އެވެ.
އީދު ދެ ދުވަހު މާލޭގައި ވެހިކަލް މަނާ ވަގުތު ކަނޑައެޅުމަށް އެދި ހުށަހެޅީ ގަލޮޅު މެދު ދާއިރާގެ މެންބަރު ރީހާން ނާޒިމެވެ. މި ހުށަހެޅުން ވަނީ ޖަލްސާގައި ބައިވެރިވި ހުރިހާ ކައުންސިލަރުންގެ އިއްތިފާގުން ފާސް ކޮށްފައެވެ.
މިދިޔަ ފިތުރު އީދުގައިވެސް މާލެ ސިޓީ ކައުންސިލުން ވަނީ ދުއްވާއެއްޗެހި މަނާ ވަގުތު ކަނޑައަޅާފައެވެ.