މީމު އެއާޕޯޓުގެ ރަންވޭ އެޅުމަށް ބޭނުންވާ ބިން ހިއްކަން ފަށައިފި އެވެ.
މ. އަތޮޅު މުލީގައި ތަރައްގީކުރާ މީމު އެއާޕޯޓް އެޅުމުގެ މަސައްކަތް އެމްޓީސީސީއާ ހަވާލުކުރީ ފެބްރުއަރ 28، 2021 ގައެވެ. އެމްޓީސީސީން އެއާޕޯޓްގެ އަމަލީ މަސައްކަތް ފެށީ އޭޕްރީލް 6، 2021 ގައެވެ.
މީމު އެއާޕޯޓް އެޅުމުގެ މަސައްކަތުގެ ދަށުން 14 ހެކްޓަރުގެ ބިން ހިއްކުމާއި، 1200 މީޓަރު ދިގު 30 މީޓަރު ފުޅާ ރަންވޭއެއް ހެދުމާއި، 1،812 މީޓަރުގެ ސަރަހައްދެއްގައި ގޮނޑުދޮށް ހިމާޔަތް ކުރުމާއި، ޓެކްސީވޭއަކާއި، އޭޕްރަންގެ އިތުރުން ޓާމިނަލެއް ވެސް ހަދާނެ އެވެ.،
އެމްޓިސީސީން ބުނީ މީމު އެއާޕޯޓް ތަރައްގީކުރުމުގެ މަސައްކަތުގެ ދަށުން ފަޔާ ބިލްޑިންގެ ޕްލާސްޓަރިން މަސައްކަތާއި، ރަންވޭ ހަދަން ހަމަޖެހިފައިވާ ސަރަހައްދުގެ ބިން ހިއްކުމުގެ މަސައްކަތާއި، ޓާމިނަލް ބިލްޑިންގެ ފައުންޑޭޝަން މަސައްކަތްތައް ކުރިއަށްދާ ކަމަށެވެ.
އެމްޓީސީސީން ކުރިން މަސައްކަތް ކުރީ މިއަހަރުގެ ފުރަތަމަ ތިން މަސް ތެރޭގައި މީމު އެއާޕޯޓުގެ މަސައްކަތް ނިންމުމަށެވެ.
އެމްޓީސީސީގެ ސީއީއޯ އާދަމް އާޒިމް މީގެ ކުރިން އަވަސް އަށް ވިދާޅުވީ މީމު އެއާޕޯޓްގެ ޑިޒައިނަށް ފަހުން ބަދަލުތަކެއް ގެނެސްފައިވާތީއާއި އެއާޕޯޓް އެޅުމަށް ކުރިން ކަނޑައަޅާފައިވާ ވަރަށް ވުރެ އިތުރަށް ބިން ހިއްކަން ޖެހުމަކީ އެއާޕޯޓްގެ މަސައްކަތް ލަސްވި ސަބަބު ކަމަށެވެ. އަދި އެއާޕޯޓްގެ މަސައްކަތްތައް މިހާރު ކުރިއަށްދާ ގޮތަށް ބަލާއިރު މި އަހަރުގެ ނޮވެމްބަރަށް މީމު އެއާޕޯޓް ނިންމާލެވޭނެ ކަމަށް ބެލެވޭ ކަމަށްވެސް އާޒިމް ވިދާޅުވެފައިވެ އެވެ.
މީމު އެއާޕޯޓުގެ މަޝްރޫއަށް ދައުލަތުގެ ބަޖެޓުން 243.9 މިލިއަން ރުފިޔާ ހަރަދުކުރުމަށް ހަމަޖެހިފައިވެ އެވެ.
މީމު އެއާޕޯޓުގެ އަމަލީ މަސައްކަތް ކުރިއަށްދާއިރު ގދ. ފަރެސްމާތޮޑާގައި ހަދަމުންދާ އެއާޕޯޓުގެ މަސައްކަތް ވެސް ނިންމުމުގެ މަސައްކަތް މިހާރު ދަނީ ކުރަމުންނެވެ. މީގެއިތުރުން ހދ. މަކުނުދޫ، ށ. އަތޮޅު ބިލަތްފަހި، ބ. ތުޅާދޫ، ފ. މަގޫދޫ، ތ. ވިލުފުށި އަދި ރ. އަތޮޅުގެ ރަށެއްގައި އެއާޕޯޓް އެޅުމަށް ސަރުކާރުން ދަނީ އިންވެސްޓަރުން ހޯދަމުންނެވެ. މީގެއިތުރުން ރ. އަލިފުށީގައި އަޅަން ނިންމާފައިވާ އެއާޕޯޓާ ގުޅޭ ބައެއް މަސައްކަތްތައް ފެށުމަށްވެސް މިހާރު ދަނީ މަސައްކަތް ކުރަމުންނެވެ.