ގދ. ގައްދޫގައި ބަނދެ ނިމިފައިވާ ދޯންޏެއްގެ ފިނިޝިން މަސައްކަތް ކުރަމުން ދަނިކޮށް ދޯނީގައި ރޯވެ ބޮޑެތި ގެއްލުންތަކެއް ލިބިއްޖެ އެވެ.
އަވަސް އަށް މައުލޫމާތު ދެއްވަމުން ގައްދޫ ކައުންސިލަރު އައިމިނަތު ފަރުހާނާ ވިދާޅުވީ މިއަދު އިރުއޮއްސެން އުޅެނިކޮށް ރޯވި ދޯންޏަކީ ގާތްގަނޑަކަށް ބަނދެ ނިމިފައިވާ ދޯންޏެއް ކަމަށެވެ.
ފަރުހާނާ ވިދާޅުވީ ގައްދޫ މީހެއްގެ މި ދޯނީގައި ރޯވީ ދޯނީގައި މަސައްކަތް ކުރަން ތިބި މީހުން އެ ސަރަހައްދުން ދިޔަ ފަހުން ކަރަންޓް ޝޯޓެއް ވެގެން ކަމަށް ބެލެވޭ ކަމަށެވެ.
އަލިފާން ރޯވިތާ ކުޑައިރުކޮޅެއްގެ ތެރޭގައި ގައްދޫ ރައްޔިތުންނާއި ފުލުހުން ގުޅިގެން ކުރި މަސައްކަތުން އަލިފާންގަނޑު ނިއްވާލި ކަމުގައިވެސް ފަރުހާނާ ވިދާޅުވި އެވެ.
"އަލިފާން އަވަހަށް ނިއްވާލި ނަމަވެސް އޭރު ދޯނީގެ ގެގަނޑު އެއްކޮށް ވަނީ އަނދާފައި. ދޯނީގެ މަތިވަނޑާންގަނޑުވެސް ވަނީ ހަލާކުވެފައި. ފަސްކޮޅު ކޮންމެވެސް ވަރަކަށް ބޭނުންކުރެވޭނެ. އެކަމަކު މިއީ ވަރަށް ބޮޑު ގެއްލުމެއް،" ފަރުހާނާ ވިދާޅުވި އެވެ.
އޭނާ އިތުރަށް ވިދާޅުވީ އަލިފާން ރޯވި ދޯނި އޮތް ސަރަހައްދުގައި އިތުރު ދޯންޏެއްވެސް ގާތްގަނޑަކަށް ބަނދެ ނިމިފައި އޮތް ކަމަށެވެ. ނަމަވެސް އެ ދޯންޏަށް އެއްވެސް ގެއްލުމެއް ނުލިބޭ ކަމަށްވެސް ވިދާޅުވި އެވެ.