އެއްވެސް ކަމެއް ސީދާ ޕްރޮސެކިއުޓާ ޖެނެރަލްގެ ސަމާލުކަމަށް ގެންނަން ބޭނުންވާނަމަ މިއަދުން ފެށިގެން ހާއްސަ އީމެއިލްއަކުން އެކަން ކުރެވޭނެ ގޮތް ހަމަޖައްސައިފި އެވެ.
ޕީޖީ އޮފީހުން މިއަދު ބުނީ އެ އޮފީހުގެ މަސައްކަތްތަކާ ބެހޭ ގޮތުންނާއި ގާނޫނުއަސާސީ އަދި ގާނޫނުން ޕީޖީ އާއި މަތިކޮށްފައިވާ ޒިންމާތަކާއި ނުވަތަ ޖިނާއީ އަދުލުގެ ނިޒާމާ ގުޅިގެން ސީދާ ޕީޖީގެ ސަމާލުކަމަށް ގެންނަން ބޭނުންވާ ކަންކަން ބަޔާންކޮށް އެ މައްސަލަ ހިއްސާކުރުމަށް އީމެއިލެއް ގާއިމްކޮށްފައިވާ ކަމަށެވެ.
އެގޮތުން [email protected] އަށް މިއަދުން ފެށިގެން އެފަދަ ކަންކަން އީމެއިލް މެދުވެރިކޮށް ހުށަހެޅޭނެ ކަމަށް އެ އޮފީހުން ބުނެ އެވެ.
ޕީޖީ އޮފީހުން ބުނީ މިގޮތަށް މެއިލްކުރާ ކަންކަމުގެ ތެރެއިން ސީދާ ޕީޖީގެ ފަރާތުން ޖަވާބެއް ނުވަތަ ރައުޔެއް ދޭން ޖެހޭނަމަ އެ މެއިލަކަށް ޖަވާބު ދޭނީ ސީދާ ޕީޖީ ހުސައިން ޝަމީމް ކަމަށެވެ.
"އީމެއިލް އަށް ސީދާ ވަކި ޖަވާބެއް ނުދެއްވި ކަމުގައި ވިޔަސް އޮފީހުގެ މަސައްކަތްތައް ބައްޓަން ކުރުމުގައި މި އީމެއިލް މެދުވެރިކޮށް ހިއްސާ ކުރެވޭ ކަންކަމަށް ޕްރޮސެކިއުޓާ ޖެނެރަލް ރިއާޔަތް ކުރައްވާނެ،" ޕީޖީ އޮފީހުން ބުންޏެވެ.
ޕީޖީ އޮފީހުން އިތުރަށް ބުނީ އެ އޮފީހުގެ މަސައްކަތްތަކާއި ޖިނާއީ އަދުލުގެ ނިޒާމު އިތުރަށް ހަރުދަނާ ކުރުމަށް ކުރަމުންދާ މަސައްކަތްތަކުގައި އާންމުންގެ ހިޔާލާއި މަޝްވަރާ އާއި ބައިވެރިވުން އިތުރުކުރުމަށް ޕީޖީ ޝަމީމް މަސައްކަތްތަކެއް ކުރައްވާ ކަމަށެވެ.
ޕީޖީ އޮފީހުން މިހާރު ވަނީ އެ އޮފީހުގެ މަސައްކަތްތަކާއި މައްސަލަތައް އަދި ގާނޫނުތައް ފަސޭހައިން ފެންނާނެހެން "ލެތުން"ގެ ނަމުގައި ވެބްސައިޓެއް ވެސް ގާއިމްކޮށްފަ އެވެ. މި ވެބްސައިޓުގެ ސަބަބުން ވަކިވަކި މައްސަލަތަކުގެ އަޕްޑޭޓުތައް ހޯދަން ވަރަށް ފަސޭހަ އެވެ.