ދުނިޔޭގެ އެންމެ ނުފޫޒުގަދަ ކުޅިވަރު ޝަހްސިއްޔަތުންގެ ތެރޭގައި ހިމެނޭ އެމެރިކާގެ މަޝްހޫރު ޓެނިސް ކުޅުންތެރިޔާ ކުޅުން ހުއްޓާލާކަން އިއުލާންކޮށްފި އެވެ.
ސެރީނާ ރޭ މިކަން އިއުލާން ކުރަމުން ބުނެފައިވަނީ ކުރިއަށް އޮތް ޔޫއެސް އޯޕަން ޓެނިސް މުބާރާތަކީ އޭނާ ޕްރޮފެޝަލް ފެންވަރުގައި ކުޅޭނެ ފަހު މެޗު ކަމަށެވެ.
އަންހެން ކުއްޖެއް ލިބިފައިވާ އުމުރުން 40 އަހަރުގެ ސެރީނާ ބުނީ ރިޓަޔާކުރަން ނިންމީ ދިރިއުޅުމުގައި ކުރިއަށް ހުރި ދުވަސްތަކުގައި ކުރަން ހުރި މުހިއްމު ކަންކަމުގެ ސަބަބުން ކަމަށެވެ.
ސެރީނާ ފާހަގަކުރެވެނީ އޭނާގެ ކުޅިވަރުގެ ހަޔާތުގައި އެކަމަށް ވަރަށް ބޮޑަށް އިސްކަންދީގެން ކެރިއަރު ބިނާކުރި އަދި މޮޅުވާން ގަދައަޅައި މަސައްކަތް ކުރި ކުޅުންތެރިއެއްގެ ގޮތުގަ އެވެ. މީގެއިތުރުން ސެރީނާ އަކީ ކުޅިވަރުގެ ދާއިރާގައި އެތުލީޓުންނަށް ލިބެންޖެހޭ ހައްގުތަކަށް ވަރަށް ބޮޑަށް ވަކާލަތު ކުުރި ކުޅުންތެރިޔެކެވެ. އެގޮތުން ނަސްލީ އަދި ޖިންސުގެ ތަފާތުތަކާ ދެކޮޅަށް އަޑުއުފުލި އެވެ. ހާއްސަކޮށް އެތުލީޓުންނަށް ދޭ އިނާމު ފައިސާ ޖިންސު ތަފާތު ނުކޮށް ހަމަހަމަކޮށް ދިނުމުގައި އަޑުއުފުލާފައިވެ އެވެ.
ޓެނިހުގެ ވޯލްޑްކަޕްގެ ގޮތުގައި ގިނަ ބަޔަކު ދެކޭ ގްރޭންޑް ސްލޭމް މުބާރާތް ސެރީނާ ވަނީ 23 ފަހަރަށް ކާމިޔާބުކޮށްފަ އެވެ.
އުމުރުން އެންމެ 17 އަހަރުގައި ގްރޭންޑް ސްލޭމް މުބާރާތެއް ކާމިޔާބުކޮށް އެތައް ބަޔަކަށް ހައިރާންކަން ގެނުވި ސެރީނާ ޓެނިހާ ދުރަށްދާތީ ކުޅިވަރަށް ސަޕޯޓްކުރާ އެތައް ބަޔަކު ދަނީ އޭނާގެ ހިދުމަތަށް ޝުކުރުއަދާކޮށް ހެޔޮއެދުމުގެ މެސެޖުތައް ހިއްސާކުރަމުންނެވެ.