އޮޑިޓާ ޖެނެރަލްގެ އޮފީސް (އޭޖީއޯ)ގެ އިމާރާތް އެޅުމުގެ މަޝްރޫއު އެމްޓީސީސީއާ ހަވާލުކޮށް އެއްބަސްވުމުގައި ސޮއިކޮށްފި އެވެ.
އޭޖީއޯގެ އޮފީސް އިމާރާތް އެޅުމަށް ހަމަޖެހިފައިވަނީ ހުޅުމާލޭ ފުރަތަމަ ފިޔަވަހީގަ އެވެ. މި އެއްބަސްވުމުގައި އޮޑިޓާ ޖެނެރަލް އޮފީހުގެ ފަރާތުން ސޮއިކުރެއްވީ ކޯޕަރޭޓް ސާވިސަސްގެ ޑިރެކްޓާ ނިޝްވާ ފިރާގު އެވެ. އަދި އެމްޓީސީސީގެ ފަރާތުން ސޮއި ކުރެއްވީ އެ ކުންފުނީގެ ސީއީއޯ އާދަމް އާޒިމް އެވެ.
އެއްބަސްވުމުގައި ސޮއިކުރުމަށް އިއްޔެ ބޭއްވި ރަސްމިއްޔާތުގައި ވާހަކަދައްކަވަމުން އޮޑިޓާ ޖެނެރަލް ހުސައިން ނިޔާޒީ ވިދާޅުވީ މި އިމާރާތް ވެގެން ދާނީ ދައުލަތުގެ ވަސީލަތްތައް ބޭނުން ކުރާ ގޮތް ބަލައި، ޓްރާންސްޕޭރެންސީ އިތުރުކޮށް ޒިންމާދާރުކުރުމުގެ މަސައްކަތް ވަރުގަދަކުރުމަށް އެޅިގެންދާ ވަރަށްވެސް މުހިންމު ފިޔަވަޅަކަށް ކަމަށެވެ.
މި އިމާރާތުން އިންސްޓްޓިއުޓް އޮފް ޗާޓާޑް އެކައުންޓެންޓްސް އޮފް ދަ މޯލްޑިވްސް ހިންގުމަށް ބޭނުންވާ ޖާގަ ލިބޭނެ ކަމަށާއި، އެކަމުގެ ސަބަބުން ޕަބްލިކް އަދި ޕްރައިވެޓް ސެކްޓާ އެކައުންޓިން ވަރުގަދަ ކުރުމަށް ބޭނުންވާ އިންފްރާސްޓްރަކްޗާ، އަދި އިދާރީ ހިންގުމުގެ ވަސީލަތްތައް ފުރިހަމަވާނެ ކަމަށްވެސް ނިޔާޒީ ވިދާޅުވެފައިވެ އެވެ.
މި އިމާރާތަކީ ހަ ފަންގިފިލާއަށް ތަރައްގީކުރާ އިމާރާތެކެވެ. މިތަނުގެ އުސްމިނުގައި 23.1 މީޓަރު ހުންނާނެ އެވެ. މި މަޝްރޫއުގެ އަގަކީ 138.67 މިލިއަން ރުފިޔާ އެވެ. އެމްޓީސީސީ އާއި މި މަޝްރޫއު ހަވާލުކޮށްފައި ވަނީ ދެ އަހަރު ދުވަހުގެ ތެރޭގައި ނިންމައި ހަވާލުކުރާ ގޮތަށެވެ.