ފުޑް ޑެލިވަރީ އެޕް ޒޮމާޓޯއަށް ރިތިކް ރޯޝަން ކުޅެދިން އިޝްތިހާރަކާ ގުޅިގެން ކޮންފެޑަރޭޝަން އޮފް އޯލް އިންޑިއާ ޓްރޭޑާސް (ސީއޭއައިޓީ) އިން މައްސަލަ ޖައްސައިފި އެވެ.
މި އިޝްތިހާރުގައި ރިތިކް އުއްޖެއިންއިން ތާލީ މީލްއެއް ކާހިއްވާ ވާހަކަ ބުނެ، މަހާކާލް އިން އޯޑަރު ކުރެ އެވެ.
މިކަމާ ގުޅިގެން ސީއޭއައިޓީން ބުނަނީ މަހާކާލް ފައްޅީގައި ދޭ ޕްރަސާދް ތާލީއަކީ އެތައް 100 އަހަރު ވަންދެން ފައްޅިއަށް އަންނަ މީހުންނަށް ހިލޭ ދޭ އެއްޗެއް ކަމަށެވެ.
މައްސަލަ ބަލައިދިނުމަށް މަދްޔަ ޕްރަދޭޝްގެ ޗީފް މިނިސްޓަރަށްވެސް ވަނީ ހުށަހަޅާފަ އެވެ.
މިކަމާ ގުޅިގެން ޒޮމާޓޯއިން މައްސަލަ ޖެހުނު އިޝްތިހާރު ޑިލީޓްކުރުމަށްފަހު ނެރުނު ބަޔާނުގައި މައާފަށް އެދިފައިވެ އެވެ. އަދި އެ އިޝްތިހާރުގައި ފައްޅިއަށާއި ދީނާ އެއްވެސް ގުޅުމެއް ނުވާ ކަމަށާއި ރިތިކް އެ ބުނަނީ މަހާކާލް ރެސްޓޯރަންޓްގެ ތާލީ މީލްގެ ވާހަކަ ކަމަށާއި އެއްވެސް މީހަކަށް ދެރައެއް ދިނުމުގެ ނިޔަތެއް ނެތް ކަމަށްވެސް ބުނެފައިވެ އެވެ.
އިންޑިއާގައި ފަންނުވެރިން އުފައްދާ އުފެއްދުންތަކާ ގުޅިގެން ޖަމިއްޔާތަކާއި އަމިއްލަ ފަރުދުން އެކަންކަމުގެ މާނަ އޮޅުވާލައި، މައްސަަލަތައް އިދާރާތަކަށް ހުށަހަޅައި ދައުވާކޮށް ހެދުމަކީ އާންމު ކަމެކެވެ.