ވިޖޭ ދޭވަރަކޮންޑާ އާއި އަނަންޔާ ޕާންޑޭގެ "ލައިގަ" ބޮޑެތި ޕްރޮމޯޝަންތަކަކަށްފަހު ސިނަމާތަކުގައި ދައްކަން ފަށައިފި އެވެ.
ޕޫރީ ޖަގައްނާދް ޑައިރެކްޓްކުރި ދަރްމާ ޕްރޮޑަކްޝަންސްގެ މި ފިލްމަކީ ސްޕޯޓްސް އެކްޝަން ފިލްމެކެވެ.
މި ފިލްމްގެ ބަތަލް ވިޖޭއަކީ އާގަންނަ ކިކްބޮކްސަރެކެވެ.
މި ފިލްމް ކުޅުމަށްޓަކައި ކިކް ބޮކްސަރެއްގެ ސިފަ އަށަގަންނަން ވެގެން ވިޖޭ ވަނީ ވަރަށް ބޮޑަށް އޭނާގެ ހަށިގަނޑު ބަދަލުކޮށް، ތައިލެންޑުން މާޝަލް އާޓްސް ޓްރޭނިން ހޯދާފަ އެވެ.
އެމެރިކާގެ ބޮކްސަރެއް ކަމަށްވާ މައިކް ޓައިސަންވެސް މި ފިލްމުން ފެނިގެންދެ އެވެ. މިއީ މައިކް ބޮލީވުޑަށް ތައާރަފްވާ ފިލްމެވެ.
މި ފިލްމްގެ ޕްރޮޑިއުސަރުން ވަނީ މި ފިލްމްގެ ލަވަތަކާއި ޓްރޭލަ ވަރަށް ބޮޑަށް ސޯޝަލް މީޑިއާގައާއި އިވެންޓްތަކުގައި ޕްރޮމޯޓްކޮށް، އޯޑިއަންސްގެ ސަމާލުކަން ހޯދާފަ އެވެ.
ވިޖޭ ދޭވަރަކޮންޑާ އަކީ ތެލެގޫ ފިލްމްތަކުން ތައާރަފްވި ތަރިއެކެވެ. އޭނާ މަގުބޫލުކަން ހޯދާފައިވަނީ "ކަބީރް ސިންގް"ގެ އޮރިޖިނަލް ފިލްމް "އަރްޖުން ރެޑީ" އިންނެވެ.