މާލެ އާއި ވިލިމާލޭގެ މަގުތަކާއި އާންމު ތަންތަން ކުނިކަހައި ސާފުކުރުމުގެ މަސައްކަތް މާލޭ ސިޓީ ކައުންސިލުން ކުރަން ފެށީ އަވަަހަށް ކުނި ނަގައި އުކާލަން ބޭނުންވާތީ ކަމަށާއި އެކަމުގައި ހުރިހާ ފަރާތްތަކުންވެސް އެއްބާރުލުން ދިނުމަށް މާލެ ސިޓީ ކައުންސިލުން އެދިއްޖެ އެވެ.
މާލެ އާއި ވިލިމާލޭގެ އާންމު ތަންތަނާއި ޕާކުތަކާއި މައިޒާންތައް ކުނިކަހައި ސާފުކޮށް ބެލެހެއްޓުމަށް މާލޭ ސިޓީ ކައުންސިލާއި ވެމްކޯއާ ދެމެދު މިހާރު ސޮއިކޮށްފައިވާ އެއްބަސްވުމަކީ ޑިސެމްބަރު 26، 2016 ގައި ނިމިދިޔަ ކައުންސިލުން ސޮއިކުރި އެއްބަސްވުމެކެވެ.
އެ އެއްބަސްވުމުގެ މުއްދަތު މިއަހަރުގެ ޑިސެމްބަރު 26 ވަނަ ދުވަހު ހަމަވުމުން، އެ އެއްބަސްވުން އާނުކުރުމަށް މާލޭ ސިޓީ ކައުންސިލުން ނިންމީ މިމަހުގެ އަށްވަނަ ދުވަހު ބޭއްވި ކައުންސިލް ބައްދަލުވުމުގައި ވަނީ ނިންމާފަ އެވެ. އެ ބައްދަލުވުމުގައި ކައުންސިލުން ނިންމީ މާލެ އާއި ވިލިމާލޭގެ މަގުތަކާއި އާންމުތަންތަން ކުނިކަހައި ބެލެހެއްޓުމުގެ މަސައްކަތް ސީދާ ސިޓީ ކައުންސިލުން ކުރުމަށެވެ.
މާލޭ ސިޓީ ކައުންސިލުން ރޭ ނެރުނު ބަޔާނެއްގައި ބުނި ގޮތުގައި ކައުންސިލުން އަމިއްލައަށް ކުނި ނަގައި އުކާލަން ނިންމީ އެ ތަންތަން ކުނިކަހައި ބެލެހެއްޓުން މިހާރަށްވުރެ ހަރުދަނާ ކުރުމަށާއި ކުނި ވީހާވެސް އަވަހަށް ނެގުމަށެވެ.
"މާލެ އާއި ވިލިމާލެ ކުނިކަހައި ސާފުކޮށް ބެލެހެއްޓުމަށް މަހެއްގެ މައްޗަށް 2.5 މިިއަން ރުފިޔާ، ހަރަދު ކުރަމުންދާއިރު، މަގުމަތީގައި ބަހައްޓާފައިވާ ކުނިތައް ގިނަވެ މަގުމަތީގައި ހިނގާބިގާވެ އުޅޭ މީހުންނަށާއި ދުއްވާ ވެހިކަލްތަކަށް އެކަމުގެ އުނދަގޫފޯރާއި އެފަދަ ކުނިތައް މަގުމަތިން ނެގުން ލަސްވަމުންދިއުމުގެ ސަބަބުން އެކަމުގެ ޝަކުވާތައް ކައުންސިލަށް އަންނަމުންދަނީ. އެކަށީގެންވާ ގޮތެއްގައި އެ މަސައްކަތް ނުކުރެވޭތީކަމަށް ވަނީ ފާހަގަކުރެވިފައި" ސިޓީ ކައުންސިލްގެ ބަޔާނުގައިވެ އެވެ.
މާލޭ ސިޓީ ކައުންސިލުން ވަނީ، އެ ކައުންސިލްގެ މުވައްޒަފުން ބޭނުންކޮށްގެން މިހާރުވެސް މާލޭގެ ބައެއް ސަރަހައްދުތައް ކުނިކަހައި ސާފުކުރަމުންދާކަން ފާހަގަކޮށްފަ އެވެ. އެގޮތުން އާޓިފިޝަލް ބީޗާއި ރަސްފަންނު ސަރަހައްދާއި ޖުމްހޫރީ މައިދާން ސަރަހައްދު ސާފުކުރަނީ ކައުންސިލުން ކަމަށް ބުނެފައިވެ އެވެ.
ކުނިކަހާ ސާފުކުރުމުގެ މަސައްކަތް ސިޓީ ކައުންސިލުން ކުރަން ފެށުމުން އެ މަސައްކަތް ރަނގަޅަށް މޮނީޓާ ކުރެވިގެންދާނެ ކަމަށްވެސް ކައުންސިލުން ގަބޫލުކުރެ އެވެ.