ލ. ގާދޫއިން ފޮނަދޫ އަށް ބަދަލުކުރާ މީހުންނަށް އެހީތެރިކަމުގެ ގޮތުން ކޮށްދޭންޖެހޭ އެއްވެސް ކަމެއް ނުކޮށްދީ ނުހުންނާނެ ކަމަށާއި ގާދޫ މީހުން ތިބީ އުފަލުން ކަމަށް، ހައުސިން މިނިސްޓްރީން ބުނެފި އެވެ.
ހައުސިން މިނިސްޓްރީން މިހެން ބުނީ، ލ. ގާދޫއިން އެއަތޮޅު ފޮނަދޫ އަށް އާއިލާތައް ބަދަލުކުރަމުންދާއިރު ހައުސިން މިނިސްޓްރީ އާއި އެމްއެންޑީއެފުން އެމީހުންނަށް އަޅާލުން ނުލިބޭކަމަށް ގާދޫގެ ބައެއް މީހުންނާ ހަވާލާދީ ބައެއް މީޑިއާތަކުން ވަނީ ރިޕޯޓްކޮށްފަ އެވެ.
"އަވަސް" އަށް މައުލޫމާތު ދެއްވަމުން ހައުސިން މިނިސްޓްރީގެ އޮފިޝަލަކު ވިދާޅުވީ، ގާދޫއިން ފޮނަދޫއަށް މިހާތަނަށް ފަންސަވީހަކަށް އާއިލާ ބަދަލުކޮށްފައިވާ ކަމަށެވެ. މިހާތަނަށް ބަދަލުކުރި އާއިލާތަކަށް ފުރިހަމަ އަޅާލުމާއި ރައްކާތެރިކަން މިނިސްޓްރީގެ ފަރާތުން ދީފައިވާނެ ކަމަށާއި، މީހުން ބަދަލުކުރުމުގެ މަސައްކަތުގައި ހަރަކާތްތެރިވާ އެމްއެންޑީއެފްގެ މީހުން ވެސް އެކަން ކުރަމުންދަނީ ވަރަށް ރަނގަޅަށް ކަމަށެވެ.
އޭނާ ވިދާޅުވީ، މީހުން ބަދަލުކުރުމުގެ މަސައްކަތް ކުރަމުންދާއިރު، ހިފައިގެންގުޅޭ ސާމާނު އުފުލުމުގައި އެމްއެންޑީއެފުން އެއްވެސް ބެލުންތެރިކަމެއް ނެތް އުސޫލުން އަމަލުކުރާ ކަމަށް ބުނާ ބުނުމަކީ ހަގީގަތެއް ނޫން ކަމަށެވެ. ހުރިހާ ސާމާނެއްވެސް ފޮނަދޫއަށް ބަދަލުކުރަނީ، އެ އާއިލާއަކު އިސްކޮށް ހުންނަ މީހެއްގެ ހާޒިރުގައި އުފުލީގައި ކަމަށާއި އެތަކެތި ގެއާއި ހަމަޔަށް ގެންދަނީވެސް އެމްއެންޑީއެފްގެ މީހުން ކަމަށެވެ.
"އިހާނެތިކޮށް ކަންކަން ކުރެވޭ ކަމަށް ނިޔަތް ރަނގަޅު އެއްވެސް މީހަކު ނުބުނާނެ. ގާދޫއިން ބަދަލުކުރާ މީހުންނަށް އެމީހުން ބަދަލުކުރާ ދުވަހު ކެއުމާ ކަންކަން އަމިއްލަޔަށް ނުކުރެވޭނެތީ ހައުސިން މިނިސްޓްރީން އެމީހުންނަށް ތިން އިރުގެ ކެއުން އެބަ ފޯރުކޮށްދޭ. ކޮންމެ އާއިލާއަކަށް ފަސް ލީޓަރުގެ ފެން ކޭހެއް އެބަ ދޭ. މިއަދު ސްކޫލަށް ދިޔަ ކުދިންގެ އިންޓަވަލްގެ ކަންކަން ވެސް އެކަމަށް ދަތިވެފައި ތިބި އާއިލާތަކަށް މިނިސްޓްރީން ހަމަޖައްސައި ދިން،" އޭނާ ވިދާޅުވި އެވެ.
އެ މިނިސްޓްރީން ބުނީ މީހުން ބަދަލުކުރިއިރު އެމީހުންގެ މުދާތަކަށް ލިބުނު ގެއްލުންތަކަށް މިނިސްޓްރީން ބަދަލު ދޭން އެއްބަސްވި ކަމަށް ބުނާ ވާހަކައަކީ ދޮގެއް ކަމަށެވެ. އެއްވެސް އާއިލާއަކަށް ބަދަލު ދޭންޖެހޭ ވަރުގެ ގެއްލުމެއް، އެ މިނިސްޓްރީއިންވެސް އަދި އެމްއެންޑީއެފުންވެސް ދީފައި ނުވާނެ ކަމަށެވެ.
"މުދާ އެތަން މިތަނަށް އުކައެއް ނުލާ. އެތަކެތި ހުރީ ވަރަށް ރަނގަޅަށް ބަންދު ކޮށްފަ. އެތަކެތި އުފުލަނީ އެމްއެންޑީއެފްގެ މީހުން، ސާމާނު އުފުލާއިރު ގޭގެ ޒިންމާދާރު މީހަކު އެތަކެއްޗާއެކު އުފުލީގައި ދޭ. އެއްވެސް ފަރާތަކުން ހަގީގަތް ގެއްލޭގޮތަށް ވާހަކަ ދެއްކުމަކީ ވަރަށް ދެރަ ކަމެއް،" މިނިސްޓްރީން ބުންޏެވެ.
ގާދޫގެ ރައްޔިތުންނަށް ފޮނަދޫއިން ހޫނު މަރުހަބާއެއް ކިޔާފައިވާއިރު، ހިތްހަމަ ނުޖެހިގެން އެއްވެސް ފަރާތަކުން މިނިސްޓްރީއަށް ޝަކުވާ ހުށަހަޅާފައި ނުވާކަން އޮފިޝަލް ފާހަގަކުރެއްވި އެވެ. އޭނާ ވިދާޅުވި ގޮތުގައި، ގާދޫގެ ރައްޔިތުން ތިބީ އެމީހުން ފޮނަދޫއަށް ބަދަލުކުރުމާ ދޭތެރޭ ވަރަށް ހިތްމަހަޖެހިގެންނެވެ.
ގާދޫ ރައްޔިތުންނަށް ފޮނަދޫގައި އަޅާފައިވަނީ، 85 ގެއެވެ. ގާދޫގައި 108 އާއިލާ ދިރިއުޅޭއިރު ގެތައް އަދި ހަމަނުޖެހޭ އާއިލާތައް ދިރިއުޅޭނީ ކުއްޔަށް ދޭ ގެތަކެއްގައި ކަމަށް މިނިސްޓްރު ޑރ. މުހައްމަދު މުއިއްޒު ވަނީ ވިދާޅުވެފައެވެ. ކުލި ދައްކައިދެނީ ސަރުކާރުންނެވެ. އެއް އަހަރު ތެރޭގައި އެ އާއިލާތަކަށް ވެސް އަމިއްލަ ގެއަށް ވަދެވޭނެ އެވެ.