"މައިނޭ ޕިޔާރް ކިޔާ" އާއި "ހަމް އާޕް ކެ ހޭ ކޯން"ފަދަ ރީތި ފިލްމުތައް ޑައިރެކްޓްކޮށްފައިވާ ސޫރަޖް ބަރްޖަތިޔާގެ އާ ފިލްމުގައި އެންމެ މުހިއްމު ރޯލެއް ކުޅެނީ އަމީތާބު ބައްޗަން އެވެ.
"އޫންޗާއީ"ގެ ޓްރެއިލާ ލޯންޗުކުރުމުގެ ރަސްމިއްޔާތުގައި ސޫރަޖް ވަނީ އޭނާގެ މި ތަޖުރިބާ ކިޔައިދީފަ އެވެ. ސޫރަޖު ބުނި ގޮތުގައި އަމީތާބު ލައްވާ ފިލްމު ކުޅުވަން އޭނާ އަށް ސްކްރިޕްޓް ނެރޭޓް ކޮށްދޭން ޖެހުމުން ވަރަށް ހާސްވި އެވެ. ޒޫމް މީޓިންގް އެއް ބާއްވައި އެ ސްކްރިޕްޓް އަމީތާބަށް ނެރޭޓް ކޮށްދެވުނީ އެންޒައިޓީ އަށް ކާ ބޭސްތަކެއް ކައިގެން ކަމަށް ވެސް ސޫރަޖް ބުންޏެވެ.
"އަމީތާބަށް ސްކްރިޕްޓެއް ނެރޭޓްކޮށްދިނުމަކީ އެހާ ފަސޭހަކަމެއް ނޫން. ސަބަބަކީ އޭނާ އެ ކަނުލާ އަޑުއަހަން އިންނަނީ އެސްފިޔަވެސް ޖަހާ ނުލައި އަހަރެންގެ މޫނަށް ބަލަހައްޓައިގެން،" ސޫރަޖް ބުންޏެވެ.
ސޫރަޖް ބުނި ގޮތުގައި "މައި ޕްރޭމް ކީ ދިވާނީ ހޫނ"ގެ ސްކްރިޕްޓް ވެސް އޭނާ އަމީތާބަށް ނެރޭޓްކޮށްދިނެވެ. އެ ފަހަރު ވެސް އަމީތާބު ބަލަހައްޓައިގެން ކަޅީޖަހާނުލާ އިން ގޮތުން އޭނާ ހިތް ނުތަނަވަސްވެގެން ގޮސް ހަލާކުނުވީ ކިރިޔާ އެވެ. އެހެންވެ މިފަހަރު އަމީތާބާ ބައްދަލުކުރަން ދިޔައީ އެންޒައިޓީ އަށް ކާ ދެ ބޭހެއް ކައިގެންނެވެ.
ނަމަވެސް އަމީތާބާއެކު ފިލްމު ޝޫޓްކުރުމަކީ ސޫރަޖް ބުނި ގޮތުގައި ވަރަށް ފަސޭހަ ކަމެކެވެ.
"އަހަރެން ބުނާނީ ސާ އަކީ (އަމީތާބް އަކީ) އެންމެ މަސައްކަތްކުރަން ފަސޭހަ އެކްޓަރޭ. ސެޓުގައި އޭނާއާއެކު ހޭދަކުރި ހުރިހާ ވަގުތެއް ވެސް ވަރަށް ހިތްހަމަޖެހޭ. އަދި ވެނިޓީ ވޭންގައި ވެސް ވަރަށް ހިތްހަމަޖެހޭ ގިނަ ވާހަކަތަކެއް ދެކެވުނު." ސޫރަޖް ބުންޏެވެ.
"އޫންޗާއީ"އަކީ ފާއިތުވީ ހަތް އަހަރު ތެރޭ ސޫރަޖް ޑައިރެކްޓްކުރާ ފުރަތަމަ ފިލްމެވެ. މި ޑްރާމާ ފިލްމުގައި ކިޔައިދެނީ ހަތަރު އެކުވެރިއެއްގެ ވާހަކަ އެވެ. އެ ހަތަރު އެކުވެރިންގެ ރޯލު ކުޅެނީ އަމީތާބާއި އަނޫޕަމް ކޭރް، ބަމަން އިރާނީ އަދި ޑެނީ ޑެންޒޮޕާ އެވެ. މި މީހުން މަޝްވަރާކުރަނީ އެވަރެސްޓް ފަރުބަދައަށް އަރަން ދަތުރެއް ކުރާށެވެ. ނަމަވެސް މިކަން ކުރާނެ ގޮތެއް ހަމަނުޖެހި މަޝްވަރާ ކުރަނިކޮށް ޑެނީގެ ކެރެކްޓާ މުސްކުޅިބަލީގައި މަރުވަނީ އެވެ. އެހެންވެ އަނެއް ތިން އެކުވެރިން ޑެނީގެ ހަށިގަނޑު އަންދާލާފައިވާ އަޅިތައް ހިފައިގެން މައުންޓް އެވަރެސްޓަށް އަރަން ދަތުރު ފަށަ އެވެ.
ނޮވެމްބަރު 11 ވަނަ ދުވަހު ރިލީޒްކުރަން ތައްޔާރުވަމުންދާ މި ފިލްމުގައި ކުރީގެ މަޝްހޫރު ބަތަލާއިންގެ ތެރެއިން ސާރިކާ އާއި ނީނާ ގުޕްތާ ބައިވެރިވެ އެވެ. ފިލްމުގެ ބަތަލާއަކީ ޕަރިނީތީ ޗޯޕްޅާ އެވެ.
ފިލްމުގެ ޓްރެއިލާގައި ދައްކަނީ ހަތަރު އެކުވެރިންގެ އެކުވެރިކަމެވެ. އަދި ޑެނީ މަރުވުމުން ބާކީ ތިން ތިން އެކުވެރިން "ޔޭ ޖީވަން ހޭ" ކިޔާ ވަރަށް އަސަރުގަދަ ލަވައެއް ކިޔާތަން ޓްރެއިލާ ނިމޭ ހިސާބުގައި ފެނެ އެވެ.
ސޫރަޖް (ކ) އާއި އަމީތާބު އަދި އަނޫޕަމް (ވ)