ޗާގޮސް މައްސަލައިގައި ރާއްޖޭގެ ސިޔާސަތު ބަދަލުކޮށްފައިވާ ކަމަށް ބުނެ ރައްޔިތުންގެ މަޖިލީހަށް ކުއްލި މައްސަލައެއް ހުށަހަޅައިފި އެވެ.
ރައްޔިތުންގެ މަޖިލީހުގެ މިއަދުގެ ޖަލްސާއަށް ކުއްލި މައްސަލަ ހުށަހެޅުއްވީ މަޑުއްވަރި ދާއިރާގެ މެންބަރު އާދަމް ޝަރީފް އެވެ. ކުއްލި މައްސަލަ މަޖިލީހަށް ބަލައިގަތީ 54 މެންބަރުން ވޯޓުންނެވެ. މައްސަލަ ބަލައިގަނެ ބަހުސް ކުރަން ނުފެންނަ ކަމަށް ވޯޓު ދެއްވީ އެންމެ މެންބަރެކެވެ.
މައްސަލަ ހުށަހަޅުއްވަމުން މެންބަރު އާދަމް ޝަރީފު ވިދާޅުވީ ރާއްޖޭގެ ސަރަހައްދަކީ ކޮބައިކަމާއި އެ ސަރަހައްދަށް އެއްވެސް ބަދަލެއް ގެނެވޭނީ ރައްޔިތުންގެ މަޖިލީހުގެ ތިންބައިކުޅަ ދެބައި މެންބަރުންގެ އަގުލަބިއްޔަތުން ފާސްކުރާ ގާނޫނަކުންކަން ގާނޫނު އަސާސީގައި ވަރަށް ސާފުކޮށް ބަޔާންކުރާ ކަމަށެވެ.
އައްޑޫ ސިޓީގެ ދެކުނުން ރާއްޖޭގެ ހާއްސަ އިގްތިސާދީ ސަރަހައްދުގެ ބައެއް ހިމެނޭ ގޮތަށް ފޯޅަވައްސާއެކު އޮންނަ ޗާގޮސްއަކީ މޮރިޝަސްގެ ސިޔާދަތީ ބާރު ހިނގާ ސަރަހައްދެއްގެ ގޮތުގައި ހަމަޖެއްސުމަށް އެގައުމުން އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީ އަށް ހުށަހެޅި މައްސަލާގައި ރާއްޖެއިން މިހާތަނަށް ވަކާލާތު ކޮށްފައިވަނީ މޮރިޝަަސްއާ ދެކޮޅަށް ކަމަށް މެންބަރު ވިދާޅުވި އެެވެ.
ކުރީގެ ޑިފެންސް މިނިސްޓަރު އާދަމް ޝަރީފް ވިދާޅުވީ ރާއްޖެއިން މޮރިޝަސް އަށް ތާއީދުކޮށްފިނަމަ ރާއްޖޭގެ ހާއްސަ ސަރަހައްދުން ބައެއް ގެއްލޭނެ ކަމުގެ ބިރު މިހާރު އެބައޮތް ކަމަށެވެ. ކުއްލިއަކަށް ރާއްޖޭގެ ސްޓޭންޑް ބަދަލުކުރުމުގެ ސަބަބުން ޗާގޮސް އިން ރާއްޖޭގެ ހާއްސަ އިގްތިސާދީ ސަރަހައްދުގައި ހިމެނޭ ބައި ގެއްލޭނެތީ އެކަމުގައި ރާއްޖެއަށް ހައްގުބަސް ބުނުމުގެ ދޮރު ބަންދުވާނެ ކަމަށް ވެސްވިދާޅުވެފައިވެ އެވެ.
"ޗާގޮސް އަކީ މޮރިޝަސްގެ ސިޔާދަތީ ބާރު ހިނގާ ތަނެއް ކަމަށް އިންޓަނޭޝަނަލް ކޯޓު އޮފް ޖަސްޓިސް އިން ނިންމި މައްސަލައިގައި ގެއްލުން ލިބޭ އެއް ހަސްމަކީ ރާއްޖެ،" އާދަމް ޝަރީފް ވިދާޅުވި އެވެ.
ކުރީގެ ސިޔާސަތު ބަދަލުކުރުމުން 96،000 އަކަ ކިލޯމީޓަރުގެ ސަރަހައްދެއް ގެއްލިދާނެ ކަމަށާއި ސަރުކާރުން އަމަލުކުރާ ގޮތުން ބޭރުގެ ނުފޫޒު އޮތް ކަމަށް ގަބޫލުކުރާ ކަމުގައިވެސް އާދަމް ޝަރީފް ވަނީ ތުހުމަތުކުރައްވާފަ އެވެ.