ދިވެހިރާއްޖެ އިން ތިން ގައުމަކަށް ކަނޑައަޅުއްވާ ނޮން ރެސިޑެންޓް ސަފީރު ކަމަށްވާ ހ. ޖެހޭވައި، އިބްރާހީމް ޝަހީބް އައްޔަންކުރަން ރައްޔިތުންގެ މަޖިލީހުގެ ރުހުން ދީފި އެވެ.
ޝަހީބް މިހާރުވެސް ހުންނެވީ ރާއްޖެއިން އިންޑިއާ އަށް ކަނޑައަޅުއްވާފައިވާ ސަފީރުގެ ގޮތުގަ އެވެ. އިންޑިއާ އަށް ކަނޑައަޅުއްވާ ސަފީރު ކަމަށް ޝަހީބް އައްޔަންކުރައްވާ ރައީސް އިބްރާހީމް މުހައްމަދު ސޯލިހް އޭނާއަށް މަގާމުގެ ލިޔުން ހަވާލުކުރެއްވީ މިމަހުގެ 10 ވަނަ ދުވަހު އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި އިތުރު ތިން ގައުމަކަށް ރާއްޖެއިން ކަނޑައަޅާ ނޮން ރެސިޑެންޓް ސަފީރު ކަމަށް އިބްރާހީމް ޝަހީބް އައްޔަންކުރަން ފެންނަ ކަމަށް ފާސްކުރީ 46 މެންބަރުންގެ ވޯޓުންނެވެ.
ރާއްޖެއިން ތިން ގައުމަކަށް ކަނޑައަޅުއްވާ ނޮން ރެސިޑެންޓް ސަފީރެއްގެ ގޮތުގައި ޝަހީބް އައްޔަންކުރުމަށް ނިންމަވާ މަޖިލީހުގެ ރުހުން ހޯދުމަށް ރައީސް ސޯލިހް މަޖިލީހަށް ފޮނުއްވި ސިޓީ މަޖިލީހުގެ ތަޅުމަށް އިއްވީ މިމަހުގެ 17 ވަނަ ދުވަހު އެވެ.
ޝަހީބަށް ރުހުން ދިނުމުގެ މި މައްސަލަ ދިރާސާކުރީ ހާރިޖީ ގުޅުންތަކުގެ ކޮމިޓީންނެވެ.
އާންމު ގޮތެއްގައި ނޮން ރެސިޑެންޓް ސަފީރުން އައްޔަންކުރަނީ އެމްބަސީ ގާއިމުކޮށްފައި ނުހުންނަ ގައުމުތަކަށެވެ.
ޝަހީބަކީ ސިންގަޕޫރުގެ ލީ ކުއާން ޔޫ ސްކޫލް އޮފް ޕަބްލިކް ޕޮލިސީގައި ޕަބްލިކް އެޑްމިނިސްޓްރޭޝަންގެ ދާއިރާ އިން މާސްޓާޒް ހައްދަވާފައިވާ ބޭފުޅެކެވެ. ޝަހީބް މީގެ ކުރިން ފުރުއްވާފައިވާ މުހިއްމު ބައެއް މަގާމުތަކުގެ ތެރޭގައި ފޮރިން މިނިސްޓްރީގެ ޗީފް ޕްރޮޓޮކޯލްގެ މަގާމާއި، އެ މިނިސްޓްރީގެ އެޑިޝަނަލް ސެކްރެޓަރީގެ މަގާމާއި، ޕާމަނަންޓް ސެކްރެޓަރީގެ މަގާމުގެ ހިމެނެ އެވެ.