ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ)ގެ ނައިބު ރައީސް ކަމަށް ހއ. އިހަވަންދޫ، އާޒާދީބަހާރު، މުހައްމަދު ފިރާޝް އައްޔަންކުރަން ރައްޔިތުންގެ މަޖިލީހުން ރުހުން ދީފި އެވެ.
އެ ބޯޑުގެ ނައިބު ރައީސް ކަމަށް ފިރާޝް އައްޔަންކުރަން ފެންނަ ކަމަށް 57 މެންބަރުން ވޯޓު ދެއްވި އެވެ.
މުހައްމަދު ފިރާޝްއަށް ރައްޔިތުންގެ މަޖިލީހުގެ ރުހުން ހޯދުމަށް ރައީސުލްޖުމްޖޫރިއްޔާ އިބްރާހީމް މުހައްމަދު ސޯލިހު ފޮނުއްވި މައްސަލަ ދިރާސާކޮށް ގޮތެއް ނިންމުމަށް އެ މައްސަލައާ ގުޅޭ ދާއިމީ ކޮމިޓީއަށް ފޮނުވީ އޮކްޓޫބަރު 12 ވަނަ ދުވަހު ބޭއްވި ރައްޔިތުންގެ މަޖިލީހުގެ ޖަލްސާގަ އެވެ.
އެ މައްސަލަ ދިރާސާކުރީ ސްޓޭޓް އޯންޑް އެންޓްޕްރައިސް (އެސްއޯއީ) ކޮމިޓީންނެވެ.
ޕްރައިވެޓައިޒޭޝަން ބޯޑުގެ ނައިބު ރައީސް ކަމަށް މުހައްމަދު ފިރާޝް އައްޔަންކުރަން ފެންނަ ކަމަށް ކޮމިޓީން ފާސްވީ ކޮމިޓީގެ ތިންބައިކުޅަ ދެބައިގެ ވޯޓުންނެވެ.
ޕްރައިވެޓައިޒޭޝަން ބޯޑު އެކުލެވިގެންވަނީ ބޯޑުގެ ރައީސް އާއި ނައިބު ރައީސާއެކު ރައީސުލްޖުމްހޫރިއްޔާ އައްޔަންކުރައްވާ ހަތް މެންބަރުންގެ މައްޗަށެވެ.
ބޯޑަށް މެންބަރުން އައްޔަންކުރަނީ ދައުލަތުގެ ވިޔަފާރި ތަންތަން ޕްރައިވަޓައިޒް ކުރުމާއި ކޯޕަރަޓައިޒް ކުރުމާއި އަދި މޮނިޓާކޮށް އިވެލުއޭޓް ކުރުމުގެ ގާނޫނުގެ ދަށުންނެވެ.
ބޯޑުގެ މަސައްކަތްތަކުގެ ތެރޭގައި ދައުލަތުގެ ވިޔަފާރި ތަންތަން ޕްރައިވަޓައިޒްކުރުމުގެ ކަންކަން ރާވައި ހިންގައި ބެލެހެއްޓުން ހިމެނެ އެވެ. ބޯޑުގެ މެންބަރެއްގެ މެންބަރުކަމުގެ ދައުރަކީ ހަތަރު އަހަރު ދުވަހެވެ.