އެސްއެމްއީ ޑިވެލޮޕްމަންޓް ފައިނޭންސް ކޯޕަރޭޝަން (އެސްޑީއެފްސީ) އިން ތިން ލޯނެއް ފިޔަވާ އެހެން ހުރިހާ ލޯނެއް ދޫކުރުން ވަގުތީ ގޮތުން މަޑުޖައްސާލައިފި އެވެ.
އެސްޑީއެފްސީން ނެރުނު ބަޔާނެއްގައި ބުނެފައިވަނީ 2022 ވަނަ އަހަރުގެ ޓެކްސް ބަޔާނުގެ ކަންކަން ކުރުމަށްޓަކައި ތިން ލޯނެއް ފިޔަވާ ހުރިހާ ލޯނެއް ދޫކުރުން ވަގުތީގޮތުން މަޑުޖައްސާލަފައިވާ ކަމަށެވެ.
އެސްޑީއެފްސީން ދެމުން ގެންދާ ހިދުމަތްތަކުގެ ފެންވަރު ކުރިއަށް އޮތް ތަނުގައި ރަނގަޅު ކުރާނެ ކަމަށްވެސް ބުނެފައިވެ އެވެ.
މިވަގުތު ދޫކުރަމުންދާ ލޯންތަކަކީ ދަނޑުވެރިކަމަށް ހާއްސަކޮށް ދޫކުރާ ލޯނާއި ކަނޑުފަޅު ނަފާ ލޯނެވެ. މީގެ އިތުރުން ލޮނުފެން ފިނިކުރާ ނިޒާމު ގާއިމުކުރުމަށް ދޫކުރާ ލޯނަށް އެދި ހުށަހެޅުމުގެ ފުރުސަތު ވެސް އެބައޮތެވެ.
އެސްޑީއެފްސީ އިން ބުނީ ލޯނަށް އެދި މިހާރު ލިބިފައިވާ ހުށަހެޅުންތައް ބަލާނެ ކަމަށެވެ. ލޯނާއި ބެހޭ ލިޔެކިޔުންތަކަށް ޕޯޓަލް މެދުވެރިކޮށް އެދެވޭނެ ކަމަށްވެސް ބުނެފައިވެ އެވެ.
އެސްޑީއެފްސީގެ ލޯނުތަކަށް އެދުމުގެ ފުރުސަތު އަލުން ހުޅުވާލަން ނިންމާފައިވަނީ ކުރިއަށް އޮތް ޖެނުއަރީ 31 ވަނަ ދުވަހު އެވެ. ނަމަވެސް ތާރީހު ބަދަލުވުމަކީ އެކަށީގެންވާ ކަމެއް ކަމަށްވެސް ބުނެފައިވެ އެވެ.