މިހާރު ހުރި ހިސާބަށް އައީ ގޯސްތަކެއް ވެސް ހެދިގެން ކަމަށާއި، އެކަމަކު ކުރެވުނު މަސައްކަތުން ލިބުނު ކުރިއެރުމާ މެދު ފަހުރުވެރި ވާކަމަށް ބުނެ، ފްރާންސްގެ ތަރި ކަރީމް ބެންޒެމާ ގައުމީ ޓީމަށް ކުޅުން ހުއްޓާލިކަން އިއުލާންކޮށްފި އެވެ.
ފީފާ ވޯލްޑް ކަޕް ފައިނަލުގައި އާޖެންޓީނާ އަތުން ފްރާންސް ބަލިވިތާ އެއް ދުވަސް ފަހުން، އިއްޔެ ބެންޒެމާ ކުރި ޓްވީޓެއްގައި ބުނީ މިއީ އޭނާގެ ބައިނަލްއަގްވާމީ ކެރިއަރު ނިމޭ ހިސާބު ކަމަށެވެ.
ބެންޒެމާ ގައުމީ ޓީމަށް ކުޅުން ހުއްޓާލިކަން އިއުލާންކުރީ އޭނާގެ 35 ވަނަ އުފަން ދުވަހު އެވެ. ބެންޒެމާ ކުރި ޓްވީޓުގައި އޭނާގެ ކެރިއަރުގެ އުނދަގޫ ދުވަސްތަކާ ގުޅޭގޮތުން ބައެއް ވާހަކަތައް ހިއްސާކޮށްފައިވެ އެވެ.
"އަހަރެން މި ހިސާބަށް އާދެވުނުއިރު ގޯސްތަކެއް ހެދުނު. އެކަމަކު މި ހުރެވުނު ހިސާބާ މެދު އަހަރެން ފަހުރުވެރިވޭ. މި ހިސާބަށް އަންނަން އަހަރެން މަސައްކަތްތަކެއް ކުރިން" ބެންޒެމާ ބުނެފައިވެ އެވެ.
ބެންޒެމާ އަކީ ދުނިޔޭގެ މޮޅު ކުޅުންތެރިޔާ އަށް ދޭ ބެލޮންޑިއޯ އެވޯޑް އެންމެ ފަހުން ހާސިލްކުރި ކުޅުންތެރިޔާ އެވެ. އެކަމަކު މިފަހަރުގެ ވޯލްޑް ކަޕް ފެށުނު ދުވަހު ފަލަމަސްގަނޑަށް އަނިޔާވުމުގެ ސަބަބުން ބެންޒެމާ އަށް ވޯލްޑް ކަޕްގައި ނުކުޅެވުނެވެ.
ބެންޒެމާ އަށް ފްރާންސްގެ ގައުމީ ޓީމުން ފުރުސަތު ލިބުނީ 2007 ވަނަ އަހަރު އޮސްޓްރިއާއާ ދެކޮޅަށް އެޓީމު ކުޅުނު މެޗުގަ އެވެ. އޭގެފަހުން ގައުމީ ޓީމުގައި ބެންޒެމާގެ ތަޖުރިބާ މާ ރަނގަޅެއް ނޫނެވެ. އޭނާގެ ކެރިއަރުގެ އެންމެ ބޮޑު ގޮންޖެހުމާ ކުރިމަތިވީ 2015 ވަނަ އަހަރު ބްލެކްމެއިލްގެ ތުހުމަތެއްގައި ގައުމީ ޓީމުން ބޭރުކުރުމުންނެވެ. އޮރިޔާން ކާޑު ބޭނުންކޮށްގެން ފްރާންސްގެ ކުރީގެ ތަރި މެތިއު ވަލްބުއޭނާ ބްލެކްމެއިކް ކުރިކަމުގެ ތުހުމަތުގައި ބެންޒެމާ ގާތްގަނޑަކަށް ފަސް ވަރަކަށް އަހަރު ގައުމީ ޓީމާ ދުރުގައި ބެހެއްޓި އެވެ.
ބެންޒެމާ އަށް އަލުން ގައުމީ ޓީމުން ފުރުސަތު ލިބުނީ މިދިޔަ އަހަރުގެ ޔޫރޯ ފުޓްބޯޅަ މުބާރާތުގަ އެވެ. އަލުން ލިބުނު ފުރުސަތުގައި ޔޫރޯގައި މޮޅު ކުޅުމެއް ދައްކައި މިދިޔަ ސީޒަނުގެ ޔޫއެފާ ނޭޝަންސް ލީގު ފްރާންސާ އެކު ކާމިޔާބުކުރި އެވެ.
ބެންޒެމާ އަށް ގައުމީ ޓީމުން ފުރުސަތުދޭން ކޯޗު ޑިޑިއޭ ޑެޝޯމްޕްސް އަށް މަޖުބޫރުވީ ރެއާލް މެޑްރިޑްގައި ދައްކަމުން އަންނަ މޮޅު ކުޅުމުގެ ސަބަބުންނެވެ. އެކަމަކު ކޯޗު ޑެޝޯމްޕްސްއާ ބެންޒެމާއާ ދެމެދު އޮތީ މާ ވަރުގަދަ ގުޅުމެއް ނޫނެވެ.
ބެންޒެމާ އެންމެ ފަހުން ފްރާންސާ އެކު ވޯލްޑް ކަޕްގައި ކުޅުނީ 2014 ވަނަ އަހަރު އެވެ. 2018 ވަނަ އަހަރު ޓީމަށް ނުނަގާ އިރު ނަސީބު ދެރަ ގޮތަކަށް މިފަހަރުގެ މުބާރާތުގައި ނުކުޅެވުނެވެ.
ގައުމީ ޓީމުން ރިޓަޔާ ކުރިއިރު ބެންޒެމާ ވަނީ 97 މެޗުގައި 37 ގޯލު ޖަހައިފަ އެވެ.