ގުޅީފަޅުގައި ހިނގި އަލިފާނުގެ ހާދިސާގައި ގެއްލުނު މީހާ ހޯދުމަށް ކުރަމުން ދިޔަ މަސައްކަތުގައި ދެ ފަހަރެއްގެ މަތިން ފެނުނު ކަށިތަކަކީ އެކެއްގެ ކަށިތަކެއް ކަމަށް ބެލެވޭ ކަމަށް ފުލުހުން މިއަދު ބުނެފި އެވެ.
ފުލުހުން މައުލޫމާތު ދޭ ގޮތުގައި ދެފަހަރެއްގެ މަތިންވެސް ކަށިތައް ފެނުނީ އެއް ސަރަހައްދަކުންނެވެ. އަދި އެކަމާ ގުޅޭ އިތުރު ތަހުގީގުތައް މިވަގުތު ކުރަމުންދާ ކަމަށްވެސް ފުލުހުން ބުނެ އެވެ.
އިންޑިއާގެ އެފްކޮންސް ކުންފުނީގެ މުވައްޒަފުން ދިރިއުޅުމަށް ބޭނުންކުރާ ތަނުގައި އަލިފާނުގެ ހާދިސާ ހިނގާފައިވަނީ މިމަހުގެ 16 ވަނަ ދުވަހުގެ ދަންވަރު އެވެ.
އަލިފާން ރޯވި ތަނުގައި 465 މީހަކު ދިރިއުޅުނެވެ. އަލިފާން ރޯވެ ވަރަށް ބާރަށް އަލިފާންގަނޑު ފެތުރިގަތުމާ އެކު ސަލަމާތްވުމަށްޓަކައި ބައެއް މީހުން ވަނީ އިމާރާތުގެ މާތީ ފަންގިފިލާތަކުން ތިރިއަށް ފުންމާލާފަ އެވެ. އެގޮތަށް ފުންމާލުމުގެ ސަބަބުން އަތާއި ފައި ބިނދިފައިވާ މީހުންނަށާއި ފިހިގެން އަދި ނޭވާ ހާސްވެގެން ވެސް ބައެއް މީހުންނަށް ފަރުވާ ދީފައިވެ އެވެ.
އަލިފާނުގެ ހާދިސާ ހިނގަން މެދުވެރިވި ސަބަބެއް އަދި އެއްވެސް އިދާރާއަކުން ހާމައެއް ނުކުރެ އެވެ.
އަލިފާނުގެ މި ހާދިސާ އާއި ގުޅިގެން އެފްކޮންސްގެ މުވައްޒަފުން ދިރިއުޅުނު އެކޮމަޑޭޝަން ބްލޮކް ވަނީ އެއްކޮށް އަނދައި ހުލިވެފަ އެވެ. އަދި އެ ކުންފުނީގެ މުވައްޒަފުން މިހާރު ވަނީ ރައްކާތެރި ތަންތަނަށް ބަދަލުކޮށްފަ އެވެ.