މާލެ ސަރަހައްދުގެ އާންމު ތަންތަނުގެ ކުނިކަހާ ސާފުކުރުމުގެ މަސައްކަތް މާލެ ސިޓީ ކައުންސިލުން ކުރާ ގޮތަށް ބަދަލުވި ނަމަވެސް އެ މަސައްކަތް ކުރަމުންދިޔަ ވެމްކޯގެ މުވައްޒަފުންގެ ވަޒީފާ ނުގެއްލޭނެ ކަމަށް އެ ކުންފުނިން ބުނެފި އެވެ.
ވެމްކޯގެ މެނޭޖިން ޑިރެކްޓަރު ޔޫސުފް ސިރާޖު މިއަދު އަވަސްއަަށް ވިދާޅުވީ މާލެތެރެ ސާފު ކުރާ މުވައްޒަފުންގެ ވަޒީފާ ނުގެއްލޭނެ ކަމަށެވެ.
"އަޅުގަނޑުމެންގެ ވިސްނުމެއް ނެތް އެބޭފުޅުން ވަޒީފާއިން ކަނޑާލާކަށް، އެބޭފުޅުންނަށް އިހްތިޔާރު އޮންނާނެ ވަޒީފާގައި ތިބުމަށް. ވެމްކޯގެ އެކި މަސައްކަތް ތަކަށް އެ މުވައްޒަފުން ބޭނުންކުރެވޭނެ. ހަމަ މިހާރުވެސް އެ ޓައިމް ފްލެކްސިބިލިޓީގެ ތެރެއިން،" އެމްޑީ ވިދާޅުވި އެވެ.
މާލެ ސިޓީ ކައުންސިލުން ވެމްކޯއާއެކު ހަދާފައިވާ އެއްބަސްވުން އާނުކުރަން ނިންމިއިރު، އެ އެއްބަސްވުމުގެ ދަށުން މާލޭގައި ކުނި ނަގައި އުކާލުމަށް 150 މުވައްޒަފުން އަދި ވިލިމާލޭގައި 30 މުވައްޒަފުން ތިއްބެވެ. އެ މުވައްޒަފުންގެ އެވްރެޖު މުސާރަ އަކީ 8،000 ރުފިޔާ އެވެ. މި މުވައްޒަފުންގެ މުސާރަ ދެމުން ދިޔައީ މާލެ ސިޓީ ކައުންސިލުން ވެމްކޯ އަށް ދައްކަމުން ދިޔަ ފައިސާ އިންނެވެ.
މާލެ ސަރަހައްދު ކުނިކަހާ ސާފުކޮށް ބެލެހެއްޓުމުގެ މަސައްކަތް މިއަދުން ފެށިގެން މާލޭ ސިޓީ ކައުންސިލުގެ ދަށަށް ބަދަލުކުރުމުން އެ މުވައްޒަފުންގެ ވަޒީފާ ގެއްލޭނެ ކަމަށް ދެކި ބައެއް މުވައްޒަފުން ކުރިން ކަންބޮޑުވުން ފާޅުކޮށްފައިވެ އެވެ.
އެފަދަ މުވައްޒަފުންނަށް މާލެ ސިޓީ ކައުންސިލުން ފުރުސަތު ދޭނެ ކަމަށް ސިޓީ ކައުންސިލުން ވެސް ކުރިން ބުނެފައިވެ އެވެ. ނަމަވެސް ވެމްކޯގެ އެމްޑީ ވިދާޅުވީ އެ މުވައްޒަފުން މާލެ ސިޓީ ކައުންސިލަށް ބަދަލުކުރުމާ ގުޅޭ ރަސްމީ އެއްވެސް މުއާމަލާތެއް ހިނގާފައި ނުވާ ކަމަށެވެ. މާލެ ސިޓީ ކައުންސިލުން މުވައްޒަފުން ހޯދަން އިއުލާން ކޮށްފައިވާތީ، މިހާރު ވެމްކޯގައި ތިބި މީހުންގެ ތެރެއިން ވެމްކޯއިން ކެނޑިގެން އެ ވާޒީފާއަށް އަމިއްލައަށް ދާން ބޭނުން މީހުންނަށް އެފުރުސަތު އޮންނާނެ ކަމުގައިvެސްއެމްޑީ ވިދާޅުވި އެވެ.
މާލެއާއި ވިލިމާލޭގެ އާންމު ސަރަހައްދުތަކުގައި އުފެދޭ ކުނިކަހާ ސާފްކުރާ މުވައްޒަފުންގެ ވަޒީފާ ނުގެއްލޭނެ ކަމަށް ވެމްކޯ އިން މިއަދު ބުނި ނަމަވެސް މީގެކުރިން ވެމްކޯ އިން ބުނަމުން ދިޔައީ އެމީހުންގެ ވަޒީފާތައް ގެއްލިދާނެތީ ކަންބޮޑުވާ ކަމަށެވެ. ވެމްކޯ އަކީ ގެއްލުމުގައި ހިންގާ ކުންފުންޏަކަށްވާއިރު 150 އެއްހާ މުވައްޒަފުންގެ ވަޒީފާ ސަލާމަތް ކުރި ގޮތެއް އެ ކުންފުނިން ނުބުނެ އެވެ.