ރައީސް އިބްރާހީމް މުހައްމަދު ސޯލިހްގެ ކެމްޕޭންގައި ބައިވެރިވެވަޑައިގެންނެވީ ރައީސް އަބްދުﷲ ޔާމީނުގެ ވެރިކަމުގައި ހިންގާފައިވާ ކޮރަޕްޝަނާއި އަނިޔާވެރިކަމުގެ އަމަލުތަކަށް ފުރުސަތު ދޭން ބޭނުން ނުވާތީ ކަމަށް ޑީއާރްޕީގެ ކުރީގެ ލީޑަރު އަހްމަދު ތަސްމީން އަލީ ވިދާޅުވެއްޖެ އެވެ.
އެމްޑީޕީގެ ރިޔާސީ ޕްރައިމަރީގެ ކެމްޕޭންގައި ރައީސް ސޯލިހްއާ އެކު ހުންނެވި ތަސްމީން އަލީ ވިދާޅުވީ ރައީސް ޔާމީނުގެ ވެރިކަމުގައި ފެނުނު ކޮރަޕްޝަނާއި އަނިޔާވެރި އަމަލުތަކުގައި އެންމެ ބޮޑު އަނިޔާއެއް ލިބުނީ އިސްލާހަށް މަސައްކަތް ކުރީ އާންމު މެންބަރުންނާއި އެ މެންބަރުންގެ އާއިލާތަަކަށް ކަމަށެވެ.
"ރައީސް ޔާމީނުގެ ވެރިކަމުގައި އެންމެ ބޮޑު އަނިޔާ ވީ ސިޔާސީ ވެރިންނަނަކަށް ނޫން. އަނިޔާއާ ކުރިމަތިވި ނިކަމެެތިކަން ތަހައަމަލް ކުރީ އާންމު މެންބަރުނަނާ، އެކްޓިވިސްޓުންނާ އެބޭފުޅުންގެ އާއިލާ ތަކުން. އެކަން އަޅުގަނޑުމެން ހަނަދާން ނުނެތޭނެ،" ސިންގަޕޫރަށް ދިވެހި ސަރުކާރުން ކަނޑައަޅުއްވާފައި ހުންނަވާ ސަފީރު ތަސްމީން ވިދާޅުވި އެވެ.
ރައީސް ސޯލިހްގެ ކެމްޕޭން ޖަގަހައިގައި ވާހަކަފުޅު ދައްކަވަމުން ތަސްމީން ވިދާޅުވީ އެންމެ ބޮޑަށް ހަނދާން ބަހަޢްޓަންވީ ކަމަކީ ރައީސް ޔާމީނުގެ އަނިޔާވެރިކަމާ ކޮރަޕްޝަނުގެ ސިފަތައް ވެރިކަމުގެ ތެރެއަށް އިޔާދަ ވިޔަނުދިނުން ކަމުގަ އެވެ. އެގޮތަށް ވާން އެދޭނަމަ މިއަދު އޮތް ހަމައެކަނި ގޮތަކީ ރައީސް ސޯލިހަށް ތާއީދުކޮށްގެން ކަމުގަ އެވެ.
ތަސްމީނު ވިދާޅުވި ގޮތުގައި އެމްޑީޕީގެ ފަރާތުން 2018 ވަނަ އަހަރު ރިޔާސީ ކެންޑިޑޭޓެއްގެ ގޮތުގަގައި ރައީސް ސޯލިހް ނިކުމެ ހޯއްދެވި ބޮޑު ކާމިޔާބީއާ ގުޅިގެން އެނގެނީ ދެންވެސް އެފަދަ ކާމިޔާބެއް ހޯދޭނެ ބޭފުޅަކީ ރައީސް ސޯލިހް ކަން ކަމަށެވެ. ކޯވިޑްގެ ބަލިމަޑުކަމާއި ރަޝިއާ-ޔުކްރޭން ހަނގުރާމަ ފަދަ ބޮޑެތި ގޮންޖެހުންތަކުގެ ތެރޭގައި ދިވެހި ރައްޔިތުންނަށް ބޭނުންވާ ތަރައްގީގެ ހަރަކާތްތައް ކުރިއަށް ގެންދެވި ގޮތުން ރައީސް ސޯލިހަކީ ވެރިކަމަށް އެންމެ ގާބިލް ބޭފުޅާކަން ސާބިތުވާ ކަމަށެވެ.
"ރައީސް ސޯލިހަކީ އަޅުގަނޑު ވަރަށް ރަނަގަޅަށް ދަންނަ ބެފުޅެއް. އަޅުގަނޑުމެންގެ ކެންޑިޑޭޓެއްްގެ ގޮތުން ހިކުމަތްތެރިކަން ހުރި ބޭފުޅެއް. ހެޔޮ ވެރިކަމެއްގެ ހުރިހާ ސިފަތަކެއް ހުރި ބޭފުޅެއްކަން ސާބިތުކޮށްދެއްވައިފި. އެެހެންވެ އަޅުގަނޑުމެން އިޚްތިޔާރު ކުރަންވީ ކެންޑިޑޭޓަކީ ރައީސް ސޯލިހް،" ތަސްމީން ވިދާޅުވި އެވެ.
ތަސްމީނަކީ ކުރީ ސަރުކާރުތަކުގައި ވަޒީރުކަމާއި ސަރުކާރުގެ އިސް އެތައް މަގާމެއް ފުރުއްވާފައިވާ ބޭފުޅެކެވެ، މީގެއިތުރުން ރައްޔިތުންގެ މަޖިލީހުގެ ނައިބް ރައީސް ކަމުގެ މަގާމު ވެސް އަދާކުރެއްވި އެވެ.