ގިނަ އަދަދެއްގެ ބަޔަކާ އެކު އިދިކޮޅު ޕީޕީއެމް / ޕީއެންސީގެ ހިނގާލުން ފަށައިފި އެވެ.
މިއަދު ހަވީރު 4:00 ހާއިރު އިދިކޮޅު ހިނގާލުން ފެށީ ޕީޕީއެމްގެ އޮފީސް ކުރިމަތިން "ހަރާމު ހުކުމް"ގެ ނަމުގަ އެވެ.
މާލެއާއި ރާއްޖޭގެ ހުރިހާ ރަށެއްގައި ކުރިއަށް ގެންދާ ގޮތަށް އިދިކޮޅު ކޯލިޝަނުން މިއަދު ހިނގާލުމެއް ފަށާފައި މިވަނީ ކުރީގެ ރައީސް އަބްދުﷲ ޔާމީން 11 އަހަރަށް ޖަލަށްލުމަށް މިދިޔަ އާދިއްތަ ދުވަހު ކްރިމިނަލް ކޯޓުން ހުކުމް ކުރުމާ ގުޅިގެންނެވެ. އިދިކޮޅު ފަރާތްތަކުން ދަނީ އާދިއްތަ ދުވަހުގެ ރެ އިން ފެށިގެން ކޮންމެ ރެޔަކު މާލޭގައި މުޒާހަރާ ކުރަމުންނެވެ.
އިދިކޮޅު ކޯލިޝަންގެ ހިނގާލުން ފަށާފައި މިވަނީ ފުލުހުންގެ ހުއްދަ އާއި އެކު އެވެ. އެހެންވެ އަދި މިހިނގާލުމުގައި އެއްވެސް ހަމަނުޖެހުމެއް ހިނގާފައެއް ނުވެ އެވެ.
ހިނގާލުން ކުރިއަށްދާއިރު ގޮވަމުންދަނީ ރައީސް ޔާމީނަށް އިއްވީ "ހަރާމް ހުކުމެއް" ކަމަށާއި އެމަނިކުފާނު މިނިވަން ކުރުމަށެވެ.
ހިނގާލުމުގެ އެންމެ ކުރީގައި ތިއްބެވީ ޕީޕީއެމް / ޕީއެންސީގެ ލީޑަޝިޕްގެ އެންމެ އިސް ބޭފުޅުންނެވެ.
އިދިކޮޅު ކޯލިޝަންގެ ހިނގާލުމުގެ ބައިވެރިން ކަޅުކުލައިގެ ޓީޝާޓުގައި ގައުމީ ދިދަ ހިފައިގެން ތިބިއިރު "ހަރާން ހުކުމް ބާތިލުކުރޭ، ރައީސް ޔާމީން މިނިވަންކުރޭ" ލިޔެފައިވާ ބެނާތަކެއް ވެސް ހިނގާލުމުގެ ބައިވެރިން ގެންގުޅުނެވެ.