ސަރުކާރު ހިއްސާވާ ކުންފުނިތައް ހިންގަނީ ގެއްލުމުގައި ކަމަށާއި އެ ކުންފުނިތަކުގެ މުވައްޒަފުންނަށް މުސާރަ ދެނީ ފިނޭންސް މިނިސްޓްރީން ފޮނުވާ ފައިސާއިން ކަމަށް އެމްޑީޕީގެ ރައީސް މުހައްމަދު ނަޝީދު މިއަދު ވިދާޅުވެއްޖެ އެވެ.
އެމްޑީޕީގެ ރިޔާސީ ޕްރައިމަރީގެ ކެމްޕޭން ދަތުރުފުޅެއްގައި މިއަދު ފުވައްމުލަކަށް ވަޑައިގެން އެރަށުގެ ރައްޔިތުންނާ ބައްދަލު ކުރައްވާ ވާހަކަފުޅު ދައްކަވަމުން ރައީސް ނަޝީދު ވިދާޅުވީ އެއީ ރައްޔިތުންގެ ފައިސާ ކަމަށެވެ.
"ވިސްނަވާތި، މުސާރަ ދިނުމަށް ފިނޭންސުން އެ ފޮނުވާ ފައިސާއަކީ ތިބޭފުޅުންގެ [ރައްޔިތުންގެ] ފައިސާ. އެނޫން އެހެން އެއްވެސް ފައިސާ އެއްވެސް މީހަކު އަތަކު ނެތް،" ރައީސް ނަޝީދު ވިދާޅުވި އެވެ.
ރައީސް ނަޝީދު ވިދާޅުވީ ޖީއެސްޓީ ހަ އިންސައްތައިން އަށް އިންސައްތައަށް އަދި ޓީޖީއެސްޓީ 12 އިންސައްތައިން 16 އިންސައްތައަށް ބޮޑުކޮށްފައިވަނީ މުސާރަދިނުމަށް ފައިސާ ހޯދުމަށް ކަމަށެވެ.
އަމިއްލަ ވިޔަފާރިތައް ކުރިއަރުވައިފިނަމަ ރައްޔިތުންގެ އާންމު ހާލަތު ރަނގަޅުވާނެ ކަމަށާއި ސަރުކާރު ހިއްސާވާ ކުންފުނިތަކުގެ މަސައްކަތް އިތުރުވެގެން ރައްޔިތުންގެ އާންމު ހާލަތަށް ބަދަލެއް ނާންނާނެ ކަމަށްވެސް ވިދާޅުވި އެވެ.
ރައީސް ނަޝީދު ވިދާޅުވި ގޮތުގައި އެންމެ ބުއްދިވެރި ގޮތަކީ އަމިއްލަ ވިޔަފާރިތައް ތަރައްގީވާނެ ގޮތްތައް ހޯދުމެވެ. އަދި އެ ވިޔަފާރިތަކުގެ ތެރެއިން ފަތުރުވެރިކަމާއި މަސްވެރިކަމާއި ދަނޑުވެރިކަމުގެ ވިޔަފާރިތައް ކުރިއެރުވުން ކަމަށްވެސް ވިދާޅުވި އެވެ.
"އެ ވިޔަފާރިތައް ކުރިއަރަމުންދާއިރު ވަޒީފާގެ ފުރުސަތުތައް އުފެދިގެން އަންނާނެ. އެއީ ދެކޮޅުޖެހޭ، ފައިދާ ލިބޭ، ރަނގަޅު ހަރުދަނާ، ދެމެހެއްޓެނިވި ވަޒީފާ،" ރައީސް ނަޝީދު ވިދާޅުވި އެވެ.