ކުރީގެ ރައީސް މުހައްމަދު ނަޝީދުގެ ވެރިކަމުގައި ދިވެހި ރައްޔިތުން މަގުމަތުކޮށްލި ކަމަށް ރައީސުލްޖުމުހޫރިއްޔާ އިބްރާހީމް މުހައްމަދު ސޯލިހު ވިދާޅުވެއްޖެ އެވެ.
އެމްޑީޕީގެ ރިޔާސީ ޕްރައިމަރީގެ ކެމްޕޭނަށް ރ. މީދޫއަށް ވަޑައިގެން މިރޭ އެ ރަށުގައި އޮތް ކެމްޕެއިނު ޖަލްސާގައި ވާހަކަފުޅު ދައްކަވަމުން ރައީސް ސޯލިހު ވިދާޅުވީ 2008 ވަނަ އަހަރު ފެށުނު ވެރިކަން ތިން އަހަރު ދުވަހުގެ ތެރޭގައި އިސްތިއުފާދީ ނިންމާލީ ދިވެހި ރައްޔިތުން މަގުމަތިކޮށްލާފައި ކަމަށެވެ. އަދި ދެވަނަ ފަރަހަށް އެފަދަ ފުރުސަތެއް ދޭނީތޯ ވިސްނަންޖެހޭކަން އެމަނިކުފާނު ހަނދާންކޮށް ދެއްވި އެވެ.
"2008 ވަަނަ އަހަރު ފެށި ވެރިކަން ނިންމާލީ ރައްޔިތުން މަގުމަތި ކޮށްލާފައި،" ރައީސް ވިދާޅުވި އެވެ.
ރައީސް ސޯލިހު ވަނީ އެމްޑީޕީގެ ރިޔާސީ ކެންޑިޑޭޓެއް ހޮވާއިރު، ތަފާތު ފިކުރުގެ މީހުންނާ އެކު މަސައްކަތް ކުރެވޭނެ އަދި ކަމުގެ ގާބިލުކަން ހުރި ކެންޑިޑޭޓަކު އިންތިހާބުކުރުމަށް އިސްކަންދިނުމުގެ މުހިއްމު ކަންވެސް ފާހަގަކުރައްވާފަ އެވެ. އަދި އެމަނިކުފާނުގެ ވެރިކަމުގައި އެފަދަ ބޭފުޅުންނާ އެކު މަސައްކަތްކޮށް ތަރައްގީ ގެނެސްދެމުންދާ ކަމުގައިވެސް ވިދާޅުވި އެވެ.
"އަޅުގަނޑު މި ވެރިކަމުގައި ތަފާތު ފިކުރުގެ ބޭފުޅުންނާއެކު މަސައްކަތް ކޮށްފިން. އަދިވެސް އެފަދައިން މަސައްކަތް ކޮށް ތަރައްގީ ގެނެވޭނެކަމުގެ ޔަގީންކަން އަރުވަން،" ރައީސް ވިދާޅުވި އެވެ.
މީގެކުރިން ވެރިކަން ކުރެއްވި ބޭފުޅުން ރ. އަތޮޅުގެ ރަށްތަކަށް ބޭނުންވާ އަސާސީ ހިދުމަތްތައް ފޯރުކޮށްދިނުމަށް އިސްކަންދީފައި ނުވާކަންވެސް ރައީސް ސޯލިހު ވަނީ ފާހަގަކުރައްވާފަ އެވެ. އަދި އެ އަތޮޅުގައި މީހުން ދިރިއުޅޭ 15 ރަށަށް ބޭނުންވާ މުހިއްމު ހިދުމަތްތައް ފޯރުކޮށްދިނުމަށްޓަކައި މި ސަރުކާރުން ވީވައުދުތަކުގެ ތެރެއިން ގިނަ ކަންތައްތައް ފުރިހަމަވެފައިވާ ކަމަށާއި، މިހާރުވެސް ގިނަ މަޝްރޫއުތަކެއް ކުރިއަށްދާ ކަމުގައި ވިދާޅުވި އެވެ.
ރައީސް ވަނީ ރ. އަތޮޅުގެ ރަށްތަކުގައި މިހާރު ކުރިއަށްދާ ތަރައްގީގެ ގިނަ މަޝްރޫއުތަކާއި ކުރިއަށް އޮތް އަހަރު ތެރޭ ކުރަން ނިންމާފައިވާ ބައެއް ކަންކަންވެސް ފާހަގަކުރައްވާފަ އެވެ.
"މީދުގައި އަޅަން ނިންމާފައިވާ ހޮސްޕިޓަލްގެ ކުރެހުން ނިންމާ މިހާރު ވަނީ ޓެންޑަރިންގެ މަރުހަލާގައި. ސުކޫލުގެ އިމާރާތުގެ މަސައްކަތް އަންނަނީ ކުރެވެމުން. އައުޓްޑޯ ޖިމް އަދި ކުޑަކުދިންގެ ޕާކުގެ އިތުރުން ފުޓުބޯޅަ ދަނޑުގައި ޓާފް އެޅުމުގެ މަސައްކަތް ވަނީ ނިމެން ގާތްވެފައި،" ރައީސް ވިދާޅުވި އެވެ.
އެމްޑީޕީގެ ރިޔާސީ ޕްރައިމަރީގެ ކެމްޕޭންގައި ރައީސް ސޯލިހު ވަނީ ރ. މާކުރަތު އަދި އިންނަމާދޫއަށް ވެސް މިއަދު ވަޑައިގެންފަ އެވެ.
ރައީސް ސޯލިހްގެ ވާދަވެރި ކެންޑިޑޭޓް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވެސް މިއަދު ވަނީ އއ. އަތޮޅާއި އދ. އަތޮޅާއި ފ. އަތޮޅާ އަދި ދ. އަތޮޅަށް ކުރައްވާ ދަތުރުފުޅެއް ފައްޓަވާފަ އެވެ.
އެމްޑީޕީގެ ޕްރައިމަރީގައި ވޯޓުލުމަށް ހަމަޖެހިފައިވަނީ މިމަހުގެ 28 ވަނަ ދުވަހު އެވެ. އެހެންވެ ކެމްޕޭންގެ ފޯރި ވަނީ ވަރަށް ބޮޑަށް ގަދަވެފަ އެވެ.