އެމްޑީޕީގެ ރިޔާސީ ޕްރައިމަރީގެ ކެމްޕެއިނަށް ރައީސުލްޖުމުހޫރިއްޔާ އިބްރާހީމް މުހައްމަދު ސޯލިހް ނ. އަތޮޅަށް މިއަދު ވަޑައިގެންފި އެވެ.
ނ. އަތޮޅަށް ކުރައްވާ މި ކެމްޕެއިން ދަތުރުފުޅުގައި އެމަނިކުފާނު ފުރަތަމަ ވަޑައިގަތީ ނ. ކެނދިކުޅުދޫ އަށެވެ. ކެނދިކުޅުދޫއަށް ވަޑައިގެން ރައީސް ވަނީ ސަޕޯޓަރުންނާ ބައްދަލުކުރައްވާފަ އެވެ.
ނ. އަތޮޅަށް ވަޑައިގަތުމުގެ ކުރިން ރައީސް ސޯލިހް ވަނީ ރ. އަތޮޅަށް ވެސް ކެމްޕެއިނު ދަތުރުފުޅެއް ކުރައްވާފަ އެވެ. އަދި ރ. މީދޫގައި ރޭ ވަނީ ޕްރައިމަރީ ކެމްޕެއިން ޖަލްސާއެއް ވެސް ބާއްވާފަ އެވެ.
އެމްޑީޕީގެ ރިޔާސީ ޕްރައިމަރީ ބޭއްވުމަށް ހަމަޖެހިފައިވަނީ މިމަހުގެ 28 ވަނަ ދުވަހު އެވެ.
ރައީސް އިބްރާހީމް މުހައްމަދު ސޯލިހްގެ އިތުރުން މި ޕްރައިމަރީގައި ވާދަކުރައްވަނީ ރައީސް މުހައްމަދު ނަޝީދެވެ. ޕާޓީގެ ރިޔާސީ ޕްރައިމަރީގެ ފޯރި ގަދަވެފައިވާއިރު ރައީސް ސޯލިހާއި ރައީސް ނަޝީދު ގެންދަވަނީ ކެމްޕޭން ހަރަކާތްތައް ހިންގަވަމުންނެވެ.
އެމްޑީޕީން އާންމުކުރި ދާއިމީ ލިސްޓުގައިވާ ގޮތުން 57،255 މީހުންނަށް އެ ޕާޓީގެ ރިޔާސީ ޕްރައިމަރީގައި ވޯޓު ލެވޭނެ އެވެ.