މާލޭގެ ރައްޔިތުންނަށް ވައުދުވެވަޑައިގެންނެވި ގޮތަށް އެއްވެސް ރައްޔިތަކު ބާކީ ނުކޮށް ފްލެޓާއި ގޯތި ހޯދައިދޭނެ ކަމުގައި ރައީސް އިބްރާހީމް މުހައްމަދު ސޯލިހް ވިދާޅުވެއްޖެ އެވެ.
ރައީސް މިރޭ މާލޭގައި ދަރުބާރުގޭގައި ބައްދަލުކުރެއްވީ މާލެ ދާއިރާގެ މެންބަރުންނާއި ކެމްޕޭން ޓީމުތަކާ އެވެ.
މިބައްދަލުވުމުގައި ރައީސް ސޯލިހް ވިދާޅުވީ މާލޭގެ ރައްޔިތުންނަށް ހާއްސަކޮށްގެން ހަދަމުންދާ 7،000 ފްލެޓްގެ މަސައްކަތް ކުރިއަށްދާ ކަމަށެވެ. އަދި މާލޭ ރައްޔިތުންނަށް ދޫކުރާނެ ކަމަށް ވައުދުވެވަޑައިގެންނެވި 5،000 ގޯތި ދޫކުރުމާ ގުޅޭ މަސައްކަތްތައް ހިނގަމުންދާ ކަމަށާއި މިއަހަރު އެ ގޯތިތައް މާލޭގެ ރައްޔިތުންނަށް ލިބޭނެ ކަމަށެވެ.
ރައީސް ވިދާޅުވީ މާލޭގެ ރައްޔިތުންނަށް ބޯހިޔާވަހިކަން ބޭނުންވާ މިންވަރު އެމަނިކުފާނަށް ވަރަށް ރަނގަޅަށް އިހްސާސް ކުރެއްވޭ ކަމަށެވެ. އެހެންވެ ބޯހިޔާވަހިކަމުގެ ވާހަކަ އަކީ ވޯޓު ހޯއްދަވަން ދައްކަވާ ވާހަކަ ނުހައްދަވާނެ ކަމުގައިވެސް ވިދާޅުވި އެވެ.
"މިކަމާ ވޯޓަކާ ނުގުޅުވާނަން. މި އަހަރުގެ މެދަށްދާއިރު ވައުދުވީ ގޮތަށް މާލޭގެ ރައްޔިތުންނަށް ގޯތި ކަނޑާފައި ދޭނަން،" ރައީސް ވިދާޅުވި އެވެ.
މާލޭގެ ރައްޔިތުންނަށް އަމާޒުކޮށްގެން ހުޅުވާލި ގޯތިތަކާއި ފްލެޓްތަކަށް ހުށަހެޅި ފޯމުތައް އިވެލުއޭޓް ކުރުމުގެ މަސައްކަތް ދެފުށް ފެންނަ ގޮތަކަށް ކުރުމަށްފަހު ޝަރުތު ހަމަވާ އެއްވެސް މީހަކު ބާކީ ނުވާނެ ގޮތަކަށް ބޯހިޔާވަހިކަމުގެ ވައުދު ފުއްދަވައިދެއްވާނެ ކަމުގެ ޔަގީންކަންވެސް ރައީސް ދެއްވި އެވެ.
ރައީސް އިތުރަށް ވިދާޅުވީ ރާއްޖޭގައި އެއްވެސް ސަރުކާރަކުން މިހާތަނަށް ހިންގާފައި ނުވާ ވަރަށް ބޯހިޔާވަހިކަމުގެ މަޝްރޫއުތައް ހިނގަމުންދާ ކަމަށެވެ. އެގޮތުން ރާއްޖޭގެ އެކި ހިސާބުތަކުގައި 16،000 އެއްހާ ފްލެޓާއި ރޯހައުސް އެޅުމުގެ މަސައްކަތް އެކި މަރުހަލާތަކުގައި ހިނގަމުންދާ ކަމުގައިވެސް ރައީސް ވަނީ ވިދާޅުވެފަ އެވެ.
މާލޭގެ ރައްޔިތުންނަށް 5،000 ގޯތި ދޫކުރާނެ ކަމަށް ރައީސް އެންމެ ފުރަތަމަ އިއުލާން ކުރީ ރައްޔިތުންގެ މަޖިލިސް މިދިޔަ އަހަރަށް ހުޅުވުމަށް ބޭއްވި ޖަލްސާގައި އިއްވެވި ރިޔާސީ ބަޔާނުގަ އެވެ. އެގޮތުން ރައީސް ވިދާޅުވީ ހުޅުމާލެ އިން 1،000 ގޯތި، ގުޅިފަޅުން 2،000 ގޯތި އަދި ގިރާވަރުފަޅު ހިއްކާ 2،000 ގޯތި މިދައުރުގައި ދޭނެ ކަމަށެވެ.